දැනට පෘථිවිය මත ජීවත් වන හොඳම "මොළයක්" ලෙසින් සැලකෙන ස්ටීවන් හෝකින්ග් මහතා ලොව සුපතල විද්‍යාඥයෙකි. කෘතීම බුද්ධිය මනුෂ්‍ය ශිෂ්ඨාචාරයට තර්ජනයක් බව ප්‍රකාශ කර තිබෙන ප්‍රමුඛතම විද්‍යාඥයා වන්නේ ද හෝකින්ග් මහතායි. ඔහු පවසන්නේ කෘතිම බුද්ධිය හෙවත් A.I. තාක්ෂණය මිනිස් මොළය හා සමවී සංකීර්ණ ගැටළු විසඳීම දක්වා දියුණු වනු ඇති බවත්, ඉනුත් නොනැවතී මිනිස් මොළය ඉක්මවා යන තරමේ සුපිරි දියුණුවක් ලබා ගනු ඇති බවයි. නිවැරදි ආකාරයෙන් භාවිතා කළ හොත් මනුෂ්‍ය ජීවිතවල දැවැන්ත පෙරළියක් කෘතිම බුද්ධි තාක්ෂණය නිසා සිදු වනු ඇති අතරම පෘථිවියේ ස්වභාවික තුලනයට කාර්මික දියුණුව නිසා සිදු කර ඇති හානිය මැඩ පැවැත්වීම වැනි තිරසාර ව්‍යාපෘතීන් සඳහාත් ඵලදායී ලෙස භාවිතා කළ හැකියි. කෙසේ වෙතත් A.I. යනු දැවැන්ත ව්‍යසනයක් බවට පත්වීමේ සම්භාවිතාවය ද ඉතා ඉහළ බව හෝකින්ග් ගේ විශ්වාසයයි.

"මනුෂ්‍ය ජීවිතයේ සියළු අංගයන් කෘතිම බුද්ධිය මගින් සුවිසල් පරිවර්තනයකට ලක් කෙරෙනු ඇත. ඵලදායක ආකරයෙන් ක්‍රියා කරවිය හැකි A.I. තාක්ෂණයක් නිර්මාණය කිරීම මානව ශිෂ්ඨාචාරයේ සුවිශේෂීතම අවස්ථාවක් වනු ඇත. ඒ සුවිශේෂීත්වය හොඳට හෝ නරකට  සිදු විය හැකි අතර කෙසේ සිදු වේද යන්න අප තවමත් නොදන්නා කාරණාවකි." ස්ටීවන් හෝකින්ග් මෙසේ පවසා සිටියේ පසුගියදා පෘතුගාලයේ පැවැත්වුනු 2017 වෙබ් සමුළුවේදීයී. 

හෝකින්ස් යනු ජීවතුන් අතර සිටින විශිෂ්ඨතම විද්‍යාඥයා නිසා ඔහුගේ ප්‍රකාශ සියළු දෙනාගේම පිළිගැනුමට ලක්වේ. කෘතිම බුද්ධි පරිණාමනයේ ඇති දුර්විපාක පිළිබඳව අනතුරු අඟවන්නේ හෝකින්ස් පමණක් නොවේ. ටෙස්ලා හා ස්පේස්එක්ස් සමාගම් ප්‍රධානී එලෝන් මස්ක් ද මේ පිළිබඳව ප්‍රසිද්ධියේ අනතුරු අඟවා තිබේ. ඔහු සිය ට්විටර් ගිණුමේ ප්‍රකාශ කර ඇති පරිදි  "ඔබ A.I. තාක්ෂණය පිළිබඳ සිතා බලා නොමැති නම්, මේ එයට කාලයයි. කුමක් නිසා ද යත්, එය උතුරු කොරියානු න්‍යෂ්ඨික මිසයිලයකට වඩා භයානක වන නිසාවෙනි." යන වදන් වලින් එය තේරුම් ගත හැකියි. 

කෘතිම බුද්ධිය ගෝනි බිල්ලෙක් ලෙස හුවා පෑමක් හෝකින්ග් සිදු නොකරයි. එය ඇත්ත වශයෙන්ම මාහැඟි තාක්ෂණයක් බවත්, සිතා ගත නොහැකි තරමේ ආශ්චර්යවත් කාර්යයක් රැසක් A.I. තාක්ෂණය ආධාරයෙන් සිදු කර ගත හැකි බවත් හෝකින්ග් පිළිගනී. නමුත් ඔහු බල කර සිටින කාරණය වන්නේ කෘතිම බුද්ධිය හසුරුවන දිශානතිය පිළිබඳව තීන්දු තීරණ ගැනීමට මිනිසාගේ වාරය දැන් එළඹ ඇති බවයි. අප තවත් ප්‍රමාද වීමෙන් A.I. තාක්ෂණය හැසිරවීමේ අවස්ථාව මිනිසාගෙන් ගිලිහී යනු ඇති බවට ඔහු අනතුරු අඟවා සිටී. තාක්ෂණය හැසිරවිය යුතු ආකාරය ගැන නිශ්චිත අවබෝධයකින් තොරව කෘතිම බුද්ධිය දියුණු කරවීම ඉතා අන්තරාදායක ක්‍රියාවක් වනු ඇත.

හැසිරවීමකින් හා නියාමනයකින් තොරව කෘතිම බුද්ධි පර්යේෂණ සිදු කිරීම හා එය දියුණු කරවීම මිනිස් වර්ගයාගේ අවසානය දක්වා දුරදිග යන්නක් බව හෝකින්ග් ගේ අදහසයි. අවි ආයුධ පාලනය සියතට ගැනීම, ආර්ථිකය අස්ථාවර කිරීම, මිනිස් ශ්‍රම අවස්ථා උදුරා ගැනීම ආදී දරුණු දුර්විපාක නිසි ලෙස කළමණාකරනය නොකරන ලද කෘතිම බුද්ධි වැඩසටහකින් ඔබ බලාපොරොත්තු විය යුතුයි. සමහර විටෙක මේ සියල්ල ඉක්මවා යන අප නොසිතන, අපට සිතා ගත නොහැකි තරමේ අති සුපිරි ආකාරයකින් වුවත් මිනිසා අභිබවා යෑමේ හැකියාවක් අනාගතයේදී කෘතිම බුද්ධියට නොලැබෙනු ඇතැයි කෙසේ කිව හැකිද ?

 

හයිබ්‍රිඩ් හෙවත් දෙමුහුම් රථ වාහන ගැන කථා කරද්දී, හොන්ඩා සමාගමේ නමත් එතැන කියවෙන නමුත්, ඔවුන් එම ක්ෂේත්‍රයේ හොඳ නමක් අත් කරගෙන ඇති බවක් නම් පැවසිය නොහැකියි. Honda Accord, Civic Hybrid, CR-Z හා Insight වැනි හයිබ්‍රිඩ් වාහන හොන්ඩා සමාගමෙන් එළි දක්වා ඇති අතර ඒවා හයිබ්‍රිඩ් වෙළඳපොලේ උසස්ම මට්ටමේ නිෂ්පාදන ලෙසින් නොසැලකේ. කෙසේ වෙතත් හයිබ්‍රිඩ් වාහන වලින් යම් පසුබැස්මක් ලැබුවත්, හොන්ඩා සමාගම රථ වාහන ක්ෂේත්‍රයේ නව ඉසව් සොයා යන ගමන නම් නතර කර නැති බව පෙනේ. පසුගිය දා ටෝකියෝ මෝටර් ප්‍රදර්ශණයේදී ඔවුන් විසින් එළි දක්වන්නට යෙදුණු Sports මාදිලියේ විදුලි වාහනය හොන්ඩා සමාගමේ අනාගත අභිප්‍රායයන් මැනැවින් පෙන්නුම් කරයි.

මෙම නව වාහන මාදිලිය නවතම නිර්මාණ සංකල්පයන් අනුව නිර්මාණය වී තිබේ. හොන්ඩා හි පෙර වාහන මාදිලින් හි අන්තර්ගත වූ නිමාවන් සමග අලුත්ම සංකල්පයන් මුසු කරමින් මෙය නිර්මාණය වී ඇති බව පෙනේ. නිමාව සහ පෙනුම අනුව පෙනී යන්නේ මෙය rear-wheel drive හෙවත් පසුපස රෝද මගින් ධාවනය වන රථයක් බවයි. හොන්ඩා සමාගම පවසන්නේ මෙහි සුමුදු ධාවනයක් හා විශිෂ්ඨ හැසිරවීමක් අපේක්ෂා කළ හැකි බවයි.

හොන්ඩා හි නව Sports EV මාදිලියට කෘතිම බුද්ධි සහායත් ඇතුළත් කර තිබේ. මෙය Honda Automated Network Assistant ලෙස හඳුන්වයි. රියදුරු හා රථය වඩාත් හොඳින් එකමුතු කරන සම්බන්ධතාවයක් මෙම රථය මගින් ඇති කරවන බව හොන්ඩා සමාගමේ අදහසයි. මෙම කෘතිම බුද්ධි සහාය කුමන් මට්ටමක් දක්වා ද යන්න තවම විස්තර කොට නැතිමුත්, එය අර්ධ හෝ සම්පූර්ණ ස්වයංක්‍රීය ධාවනයක් දක්වා යන පද්ධතියක් ද විය හැකියි. නැතහොත් පදවන්නාගේ කැමැත්ත අනුව හැඩ ගැසෙන ධාවන පද්ධතියක් ද විය හැකියි.

හොන්ඩා සමාගමෙන් වැඩි විස්තර ඉදිරිපත් කර නැතිමුත්, මෙම නව විදුලි රථය 2020 පමණ වන විට නිෂ්පාදනය කරන්නට හැකි වනු ඇතැයි පැවසේ. රථ වාහන තාක්ෂණයේ අනාගතය වන විදුලි රථ කෙරෙහි හොන්ඩා වැනි දැවැන්ත රථ වාහන නිෂ්පාදන සමාගම් හි අවධානය යොමු වීම අනාගතය කෙරෙහි සුභවාදී බලාපොරොත්තු ඇති කරන බව පැවසිය හැකියි...

ඇමෙරිකාවේ SpaceX ආයතනයේ නිර්මාතෘ හා ප්‍රධානියා වන එලෝන් මස්ක්, අභ්‍යවකාශ තරණය ගැන බොහෝ උනන්දු පුද්ගලයෙකි. අභ්‍යකාශ තරණය සාමාන්‍ය හා අඩු වියදම් කාර්යයක් කරන්නට නිරන්තරයෙන් වෙර දරන එලෝන් මස්ක් සිය SpaceX සමාගම මගින් අභ්‍යකාශ ප්‍රවාහනය වානිජ කරණය කරන්නට සමත් වී තිබේ. එහි නවතම පියවර ලෙස SpaceX විසින් නිපදවන ලද නවතම අභ්‍යවකාශ නිපැයුම වශයෙන් අභ්‍යවකාශ ගාමීන් පළඳින අභ්‍යවකාශ ඇඳුම් කට්ටලයක් එළි දක්වන්නට පසුගියදා ඔවුන් සමත් වුනා.

අභ්‍යවකාශ ගමනාගමනය, අභ්‍යවකාශ සංචාරක කර්මාන්තය තෙක් සරල හා පහසු කරන්නට එලෝන් මස්ක් සිය උපරිම වෙර දරයි. වර්තමානයේ දී නාසා ආයතනය සමග එක්වී, Dragon කැප්සියුලය ආධාරයෙන් අන්තර්ජාතික අභ්‍යවකාශ මධ්‍යස්ථානය වෙත භාණ්ඩ ප්‍රවාහනය සිදු කරන SpaceX ආයතනය, අනාගතයේදී සිය අභ්‍යවකාශ කැප්සියුල මගින් ගගනගාමීන් ප්‍රවාහනය කිරීමට ද සැරසෙමින් සිටී. මේ සඳහා අවශ්‍ය වන මූලික අවශ්‍යතාවය වන්නේ කැප්සියුලයේ සිට අභ්‍යවකාශ මධ්‍යස්ථානය වෙත ගගනගාමීන් හුවමාරුවේදී සිදුවන අව-පීඩන තත්ත්වයන්ට ඔරොත්තු දෙන ආකාරයේ අභ්‍යවකාශ ඇඳුම් කට්ටලයක් ගගනගාමීන් පැලඳ සිටිය යුතු වීමයි. මේ සඳහා සුදුසු වන ආකාරයේ විශේෂ ගගනගාමී ඇඳුමක් SpaceX විසින් නිපදවා ඇතැයි පසුගියදා නිවේදනය කෙරුණා.

මෙය පූර්ණ ක්‍රියාකාරී තත්ත්වයේ ඇති කට්ටලයක් බව එහිදී එලෝන් මස්ක් ප්‍රකාශ කර සිටියා. එමෙන්ම මෙම ඇඳුම් කට්ටලය අභ්‍යවකාශ රික්තකයේ පීඩනය මෙන් දෙගුණයක අගයක් සඳහා ඔරොත්තු දෙන බව ද සඳහන්. බැලු බැල්මට ම නවීන විද්‍යා ප්‍රබන්ධ සිනමා පටයක දැක්වෙන ආකාරයේ සුපිරි පෙනුමක් මෙම අභ්‍යවකාශ ඇඳුම් කට්ටලය සතුව ඇති බව බැලු බැල්මට පෙනෙන්නට තිබෙන කරුණකි. එලෝන් මස්ක් ප්‍රකාශ කර සිටියේ පෙනුමට සරිලන ලෙසින්ම ක්‍රියාකාරීත්වයත් සැකසීම ඔවුන් මුහුණ දුන් ලොකුම අභියෝගය බවයි.

ඒ අනුව අභ්‍යවකාශ සංචාරයන් සඳහා මිනිසුන් හට අත්‍යාවශ්‍යම උපාංගයක් වන සුපිරි අභ්‍යවකාශ ඇඳුමක් ද දැන් SpaceX සතුය. අභ්‍යවකාශ යානා මෙන්ම අභ්‍යවකාශ ඇඳුම් ද තමා ම නිපදවා ගැනීම මගින් වියදම් අඩු කරගැනීම SpaceX හි අභිප්‍රායයි. මෙම නව ඇඳුම අභ්‍යවකාශ යානා තුළ පමණක් භාවිතා වන එකක් වන අතර යානාවෙන් පිටත කටයුතු සඳහා (EVA) සුදුසු නොවේ. මෙම නව අභ්‍යවකාශ ඇඳුම් කට්ටලය පිළිබඳ සියළු තොරතුරු ලඟදීම හෙළි කරන බව එලෝ්න් මස්ක් වැඩි දුරටත් පවසා සිටී...

ලොව ජනප්‍රියතම මෙහෙයුම් පද්ධතිය වන ගූගල් සමාගමේ ඇන්ඩ්‍රොයිඩ් ජංගම මෙහෙයුම් පද්ධතියේ නවතම සංස්කරණය ඊයේ (21) එළි දැක්වුනා. ඇන්ඩ්‍රොයිඩ් හි 8.0 වන සංස්කරණය වන මෙය නම් කර තිබෙන්නේ Android 8.0 - Oreo (ඕරිඕ) ලෙසින්. ඇන්ඩ්‍රොයිඩ් සංස්කරණ නම් කරන්නේ රස කැවිලි වල නමින් බව ඔබ දැනටමත් දන්නවා ඇති. Android 8.0 හි නාමය වන ඕරිඕ යනු ඉතා ජනප්‍රිය චොක්ලට් බිස්කට් කුකී එකක වෙළද නාමයයි. මීට පෙර Kitkat නම් කල ආකාරයටම මෙහිදී ගූගල් සමාගම Oreo නාමය සඳහා අදාල නිෂ්පාදන සමාගමෙන් අවසර ලබාගෙන ඇති බව සඳහන්.

ගූගල් සමාගම විසින් මෙම නව සංස්කරණය විස්තර කර තිබෙන්නේ “Smarter, faster, more powerful and sweeter than ever. The world's favorite cookie is your new favorite Android release.” යන ලෙසයි. නව මෙහෙයුම් පද්ධති සංස්කරණය නිළ වශයෙන් එළි දැක්වීමත් සමගම ඊට අදාල ලාංඡන පිළිරුව ද ගූගල් මූලස්ථානයේ දී එළි දැක්වූවා. එයට Super Hero ආකෘතියක් එක් කිරීමට මෙවර ගූගල් සමාගම යොමු වී තිබීය ද විශේෂත්වයකි.

ඇන්ඩ්‍රොයිඩ් හි පෙර සංස්කරණය වන Nougat වලට වඩා විශේෂිත වූ වැඩි දියුණු කිරීම් රැසක් Oreo හි දැකිය හැකියි. ඔබේ ඇන්ඩ්‍රොයිඩ් දුරකථන අත්දැකීම තවත් පහසු හා විචිත්‍ර කරන්නට මෙම නව විශේෂාංගයන් සමත් වනු ඇති.

ඉමෝජි අළුත් වෙයි...

පෙර පැමිණි ඇන්ඩ්‍රොයිඩ් සංස්කරණ වල දක්නට ලැබුණු සිනා මූණු හෙවත් ඉමෝජිස් සියල්ලම පාහේ Oreo හිදී නවීකරණය කර තිබේ. ඉමෝජි සියල්ල අලුතින්ම නිර්මාණය කර තිබෙන්නේ පෙර පැවති මෝස්තරයෙන් මඳක් වෙනස් වන ආකාරයටයි. මේ නිසා ඉමෝජි වෙත නවතම පෙනුමක් ලැබී තිබේ.

බැටරි බලය සුරකින - පසුබිම් කාර්යය පාලනය...

Nougat වලදී මෙන්ම Oreo වල ද බැටරි බලය සුරැකීම සඳහා ප්‍රමුඛතාවය ලබා දී තිබේ. implicit broadcasts, background services හා location updates යන අංශයන් හි ස්වයංක්‍රීය පාලනයක් Oreo වෙතින් ලබා දී තිබේ. පසුබිමෙන් ධාවනය වන අනවශ්‍ය මෘදුකාංග යෙදවුම් නැවැත්වීම කෙරෙහි Oreo වැඩි අවධානයක් යොමු කර ඇත. මෙයින් පැහැදිලි වන කරුණ වන්නේ ඔබට වැඩි කාලයක් දුරකථනය භාවිතා කළ හැකි බවයි.


Notification සඳහා නාලිකාවන්...

Notification Channels මගින් පරිශීලකයාට ලැබෙන Notifications කාණ්ඩගත කිරීමට හැකියි. එකම ඇප් එකකදී වුවත් වෙනස් වෙනස් කාණ්ඩ යටතේ Notifications වර්ග කර පරිශීලකයා වෙත ලබා දිය හැකියි. එසේම Notifications දිස්වන ආකාරය පිළිබඳ පූර්ණ බලතල පරිශීලකයාට හිමි කර දීමට Oreo හිදී කටයුතු කර තිබේ. Notification හි පෙනුම හා කාණ්ඩගත කිරීම ද දැන් වැඩි දියුණු කර ඇති අතර ඒ නිසා Notification සමග කටයුතු කිරීම වඩාත් පහසු වී ඇති බව පැවසිය හැකියි.


ඉබේම සම්පූර්ණ වෙන මුරපදයන්...

Autofill API මගින් දැන් ඔබගේ User Name හා Passwords මතක තබා ගෙන ඉබේම ඇතුළත් වන ආකාරයට සැකසීමට පහසුකම් සලසා දී ඇත. මේ සඳහා පාස්වර්ඩ් මතක තබා ගන්නා Password Manager වැනි යෙදුමක් Autofill නමින් හඳුන්වා දී තිබේ.


එකවර App දෙකක වැඩ බලන්න - Picture in Picture පහසුකම...

Picture in Picture හෙවත් PiP යනු ඉතා ප්‍රයෝජනවත් විශේෂාංගයකි. ඔබ Messenger හි චැට් කරමින් සිටිද්දීම, වීඩියෝවක් නැරඹීමටත් මෙමගින් හැකියාව ලැබේ. සරලවම කිව්වොත්, එකවර වැඩ දෙකක් තිරයේ දිස්වීමට සැලැස්වීමට හැකියි. එසේම ඔබේ ඇන්ඩ්‍රොයිඩ් උපාංගයට අතිරේක තිරයක් ඈඳිය හැකි නම්, එම අතිරේක තිරය මත වෙනත් කාර්යයක් දිස්වෙන ලෙස සැකසීමට ද (multi-display support) Oreo මගින්   අවස්ථාව ලබා දෙයි.

---

මීට අමතරව තවත් බොහෝ නව්‍යතාවයන් Android Oreo සංස්කරණයෙන් හඳුන්වා දී තිබේ.

• Adaptive Icons and Font Resources in XML
• Support for Wide-gamut color for apps
• Better Connectivity Features
• Accessibility Feature: Fingerprint Gestures

ඔබටත් ලඟදීම ඇන්ඩ්‍රොයිඩ් ඕරිඕ හි රස බලන්නට ලැබේවි...

 

අභ්‍යාවකාශය තුල දී විවිධ ඉදිකිරීම් හා  නිර්මාණ කල හැකි ත්‍රිමාණ රොබෝ මුද්‍රණ යන්ත්‍රයක් දැන් එළි දක්වා තිබේ. මෙය හැඳින්වෙන්නේ Archinaut යන නමිනි. මෙය 3D Printer එකක් පමණක්ම නොවේ. මෙයට ඈඳා ඇති රොබෝ අත් වලින් ත්‍රිමාණව මුද්‍රණය කරන වස්තුව නිසි ලෙස සවි කරන්නට හැකියාව ඇති අතර, සංකීර්ණ ආකෘතියක් දක්වා ගොඩ නැංවීමට මෙම  Archinaut හට හැකියාව ඇත. කලින් සැකසූ පරිගණක ආකෘතියකට අනුව අදාල වස්තුවක් ත්‍රිමානව නිර්මාණය කරවීමට මෙයට හැකියාව තිබේ. වඩාත් වැදගත් වන්නේ මෙය අභ්‍යවකාශයේ ශුන්‍ය ගුරුත්වයේ හා රික්තකයේ ඉතා හොඳින් ක්‍රියාත්මක වීමයි. ඒ නිසා මෙයට රොබෝ නිර්මාණ ශිල්පී ගගනගාමියෙක් ලෙසත් පවසන්නට පුුළුවන්.

මේ රොබෝ යන්ත්‍රයට අභ්‍යාවකාශය වැනි රික්තකයක් තුලත් පොලිමර් මිශ්‍ර විවිධ අමුද්‍රව්‍ය කොටස් මිශ්‍ර කරමින් මුද්‍රණය කරන්න පුළුවන්.  මෙහි අනාගත භාවිතාවයන් අභ්‍යාවකාශය තුලම නිර්මාණය කරන විශාල අභ්‍යවකාශ යානා දක්වා ඉදිරියට දිවයන සුවිසල් පරාසයකට අයත් වෙනවා. මේ විශිෂ්ට රොබෝ "නිර්මාපකයා"නිර්මාණය කරන ලද්දේ ඇමරිකාවේ Made in Space සමාගම විසිනි. ඔවුන් මෙයට දී ඇති නම තමයි Archinaut. මීට පෙර මෙම සමාගම විසින් Zero Gravity එනම් ශුන්‍ය ගුරුත්වය යටතේ මුද්‍රණය කල හැකි 3D Printers නිර්මාණය කර ඇති අතර  එම මුද්‍රණ යන්ත්‍ර මේ වන විටත් අන්තර්ජාතික අභ්‍යාවකාශ මධ්‍යස්ථානය තුල භාවිතයට ගනු ලබයි.

Archinaut යොදා ගනිමින් සිදු කරනු ලැබූ පරීක්ෂණ වල දී 85cm දිග පොලිමර් මිශ්‍ර දණ්ඩක් තාප රික්තක කුටීරයක් තුල නිර්මාණය කරන්න මෙම රොබෝවට පුළුවන් වී තිබෙනවා.  මේ රොබෝගෙන් එළියට විහිදී ඇති රොබෝ අත් මගින් 3D print කරන දේවල් නිවැරදිව සම්බන්ද කර විශාල නිර්මාණයක්  වුවත් කරන්නට පුළුවන්.

අනාගත අභ්‍යවකාශ නිර්මාණ තාක්ෂණ ක්ෂේත්‍රයේ දී මේ නව රොබෝ නිර්මාණය හුදෙක්ම ආරම්භයක් පමණි. අනාගතයේදී අභ්‍යවකාශ ගත වන සියල්ලම අභ්‍යවකාශයේ දීම තන්නනට මෙවැනි රොබෝ හමුදාවන් යෙදවෙනු ඇත.

Archinaut ගැන වැඩි විස්තර සඳහා පහත වීඩියෝව නරඹන්න.

මොටෝරෝලා සමාගමේ නවතම නිෂ්පාදනය වශයෙන් එළි දකින්නට නියමිත Motorola Moto X4 හි නවතම තොරතුරු අන්තර්ජාලය වෙත නිකුත් කර තිබෙනවා. නිළ වශයෙන් ප්‍රකාශ කර නැතත්, අවසානයේ එළි දක්වන උපාංගය බොහෝ දුරට මෙම විශේෂාංග වලින් සමන්විත වනු ඇති බව පැවසේ. මොටෝරෝලා Moto දුරකථන කාණ්ඩයේ නවතම සංස්කරණය වන Moto X4 ස්මාට් දුරකථනය විශිෂ්ඨ නිමාවකින් සමන්විත වන අතර, ද්විත්ව කැමරා (Dual-Camera) අඩංගු කර ඇති බවට ද ආරංචි පැතිර යනවා.

 Moto X4 මධ්‍යම කාණ්ඩයේ දුරකථනයකි. එම නිසා උසස් ඝණයේ ස්මාට් දුරකථන වල ඇති සුපිරි විශේෂාංග මෙයින් බලාපොරොත්තු විය නොහැකියි. කෙසේ වෙතත් මතුපිට පෙනුම ගැන කථා කරන විට නම් මෙය සුපිරි දුරකථනයක් ලෙසින් බැලු බැල්මට පෙනී යයි. නිමාව පිළිබඳ සැලකීමේදී ඉදිරිපස තිරය විශේෂත්වයක් නැති අතර, ඇඟිලි සලකුණු කියවනය (Finger Print Scanner) ඉදිරිපස තිරයේ ස්ථානගත කිරීම හොඳ ප්‍රවනතාවයක් ලෙසින් දැක්විය හැකියි.

අඟල් 5.2 ක Full HD තිරයක්, Qualcomm Snapdragon 630 ප්‍රොසෙසරයක් හා 3,000 mAh අධිබල බැටරියක්  Moto X4 හි අඩංගු වනු ඇති. එසේම 3GB RAM මතකයකින් හා 32GB අභ්‍යන්තර මතක ගබඩාවකින් මෙය සමන්විත වනු ඇත. මුලින් සඳහන් කළ පරිදි ද්විත්ව කැමරා (Dual-Camera) අඩංගු වනු ඇති අතර එම කැමරා කාච දෙකට ඉහළින් dual-tone LED flash එකක් ස්ථානගත කර තිබෙන අයුරු දැකිය හැකියි. මෙම කැමරා ද්විත්වය 8MP (f/2.2, 120-degree FoV) හා 12MP (f/2.0) ලෙස දක්වා තිබේ. මීට අමතරව 16MP සෙල්ෆි කැමරාවක් ද දුරකථනයේ ඉදිරිපස අඩංගු කර ඇත.

මේ සියළු කාරණා නිළ නොවන තොරතුරු වන අතර අවසන් එළි දැක්වීමේදී මේ විශේෂාංග වෙනස් වනු ඇත. තවමත් Motorola Moto X4 හි මිළ ගණන් හෙළි කර නොමැත අතර එය බොහෝ විට පෙර දුරකථන මාදිලි වල මිල මට්ටමේම පවතිනු ඇතැයි අනුමාන කළ හැක...

 

පරිගණක හා වීඩියෝ ක්‍රීඩා වලට ඇබ්බැහි වූ ඕනෑම කෙනෙක් ගෙන් ඇක්ෂන් ගේම්ස් ගැන ඇසුව හොත් ලැබෙන පිළිතුරු වන්නේ, එය මොළයේ චාලක හැකියාවන්ට හා තීරණ ගැනීමේ හැකියාවන්ට ධනාත්මක ලෙසින් බලපාන බවයි. පරිගණක ක්‍රීඩා හා මොළය සම්බන්ධයෙන් කෙරෙන කථා වල දී නිතර පවසන කරුණක් වන්නේ, ක්‍රියාදාම ගණයේ ක්‍රීඩා නිසා ඉක්මනින් නිවැරදි තීරණ ගැනීමේ මොළයේ හැකියාව වැඩි දියුණු වන බව සහ ඉගැනුම් ක්‍රියාවලිය සඳහා මොළයේ ධාරිතාවය වැඩි දියුණු වන බවයි. කෙසේ වෙතත් පරිගණක ක්‍රීඩා සම්බන්ධයෙන් සිදු කරන නවතම අධ්‍යයනයන් ගෙන් හෙළිවන්නේ පරිගණක ක්‍රීඩාවන් හි නිරත වීමෙන් ඔබට ලැබෙන හොඳ ට වඩා නරක ප්‍රතිඵල වැඩි බවයි.

මොන්ට්‍රියල් සරසවියේ පර්යේෂණ කණ්ඩායක් විසින් සිදු කරන ලද අධ්‍යයනයක් මෙම නවතම සොයා ගැනීමට හේතු පාදක වී තිබේ. මෙම අධ්‍යයනය සඳහා ඉහත පර්යේෂණ කණ්ඩායම විසින් මිනිසුන් 51 දෙනෙකු සහ ගැහැණුන් 46 ක් යොදා ගෙන ඇති බව සඳහන්.

පළමුව මෙම අධ්‍යයන කණ්ඩායමට first-person වර්ගයේ ක්‍රීඩාවක් ලබා දෙන ලදී. වංගගිරියක් වැනි අවුල් ජාල සහිත මාර්ගයන් ඔස්සේ මෙම ක්‍රීඩාවේ ඉදිරියට යා යුතුව තිබිණි. මෙම ක්‍රීඩාවේ යෙදෙද්දී ලබා ගත් දත්ත අනුව පර්යේෂණ කණ්ඩායමට පෙනී ගියේ මෙම ක්‍රීඩකයින් පැහැදිලි කාණ්ඩ දෙකකට වෙන් කළ හැකි බවයි. පළමු කොටස අවකාශය පිළිබඳව සවිඥ්ඥානික වූ අතර ඔවුන් ඉහත කී අවුල් ජාලයක් වූ මාර්ග හරහා ගමන් කලේ පසුතලයේ ඇති මං සළකුණු මතකයේ තබා ගනිමිනි. දෙවැනි කොටස ප්‍රතික්‍රියාවන්ට අනුකූල වූ අතර ඔවුන් තමන් ආ මාර්ගය මතක තබා ගත්තේ වමට හා දකුණට හැරුණු ආකාරය ඇසුරෙනි. අධ්‍යයනයන්ට අනුව පෙනී ගොස් ඇත්තේ ක්‍රීඩාව සඳහා සහභාගි වූවන් ගෙන් 85% ක් දෙවැනි ආකාරය වූ ප්‍රතික්‍රියා අනුකූල අය වන බවයි.

මෙම අධ්‍යයනයේ දෙවැනි අදියර ලෙසින් එකිනෙකට වෙනස් ආකාරයේ ක්‍රීඩා වර්ග දෙකක් ලබාදෙන ලදී. පළමුව Call of Duty වැනි first-person ක්‍රීඩා කීපයක් පැය 90 ක් කාලයක් ක්‍රීඩා කරන්නට ලබා දුන් අතර, පසුව Super Mario වැනි පරිගණක ක්‍රීඩාවන් තවත් පැය 90 ක කාලයක් ක්‍රීඩා කරන්නට ලබා දී තිබේ. මෙම අදියරේ එක් එක් පරිගණක ක්‍රීඩා කාණ්ඩයක්ම අවසානයේ සහභාගි වූ සෑම දෙනෙකු ගේම මොළය ස්කෑන් පරීක්ෂාවට ලක් කරන ලදී.

මෙහිදී මොළයේ විශේෂ කලාප දෙකක් වෙත පර්යේෂකයින් ගේ අවධානය යොමු විණී. ඒ මොළයේ හිපොකැම්පසය හා සපුච්ඡ ගර්භය යන කළාප දෙකයි. හිපොකැම්පස මගින් අප නිවැරදිව ස්ථානගත කරන අතර සපුච්ඡ ගර්භය මගින් ඇබ්බැහි හා හැසිරීම් රටා ඇති කරවනු ලබයි. සාමාන්‍යෙයන් සිදුවන්නේ මේ කළාප දෙකෙන් එකක් වැඩිපුර භාවිතා වීමේදී අනෙකෙහි භාවිතාවය අඩුවී යෑමයි.

ප්‍රතික්‍රියා අනුකූලතා දැක්වූ පරිශීලකයන් සපුච්ඡ ගර්භය මත පදනම් වන අතර මේ නිසා හිපොකැම්පසයේ භාවිතාවය ක්ෂය වීමක් සිදුවේ. මේ හේතුව නිසා හිපොකැම්පසෙහි ඇති ධූසර පදාර්ථයන් අඩුවීම සිදුවේ. හිපොකැම්පසෙහි ඇති මෙම ධූසර පදාර්ථයන් අඩුවීමෙන් විෂාදය හා ඇල්ෂයිමර් වැනි දරුණු ගණයේ ප්‍රතිඵලයන්ට මුහුණු පෑමට සිදුවේ. මේ නිසා ඉහත අධ්‍යයනයෙහි යෙදුනු පර්යේෂණ කණ්ඩායම සඳහන් කරන්නේ විෂාදය හා ඇල්ෂයිමර් වැනි රෝග තත්ත්වයන් ගෙන් පෙළෙන අය කිසිසේත්ම action වර්ගයේ ක්‍රීඩාවන් හි නිරත නොවිය යුතු බවයි.

ඉහත තත්ත්වයට ප්‍රතිවිරුද්ධ ලෙසින්, Super Mario වැනි පරිගණක ක්‍රීඩාවන් වලදී හිපොකැම්පසෙහි ධූසර පදාර්ථයන් හි වැඩිවීමක් සිදුවන බව සොයා ගෙන තිබේ. මෙම තත්ත්වය ඉහත කී කාණ්ඩ දෙකටම පොදු වීම ද විශේෂත්වයකි. අවකාශමය උපයෝගීතාවයන් හිපොකැම්පසෙහි ධූසර පදාර්ථයන් වැඩි කරලීමට දායක වන බව මෙම අධ්‍යයනයෙන් හෙළි වන වැදගත් ම කාරණයයි. මේ නිසා මොළයෙහි හිපොකැම්පසයෙහි ඇති වන හානිකර තත්ත්වයන් වලක්වා ගැනීම සඳහා අවකාශමය ප්‍රතියෝජකයන් අඩංගු පරිගණක ක්‍රීඩාවන් හි යෙදීමේ වටිනාකම මෙම අධ්‍යයනයෙන් හෙළි වේ...

 

ඇන්ඩ්‍රොයිඩ් ජංගම මෙහෙයුම් පද්ධතියේ 7.0 වැනි සංස්කරණය ලෙසින් Android 7 Nougat (නෝගට්) මෙහෙයුම් පද්ධතිය එළි දකින්නේ වසරකට පමණ පෙරයි. එසේ ගතවුනු වසරක කාලය තුළ දී විවිධාකාරයේ නවතම ජංගම උපාංග රාශියක් ඇන්ඩ්‍රොයිඩ් නෝගට් සමගින් එළි දැක්විණි. ඒ අතර Galaxy S8 හා LG G6 වැනි ඉහළ කාණ්ඩයේ උපාංගයන් ද වේ. ඇන්ඩ්‍රොයිඩ් යනු ලෝකයේ ජනප්‍රියතම හා වැඩියෙන්ම භාවිතා වන මෙහෙයුම් පද්ධිතය බව සැබෑ නමුත්, ඇන්ඩ්‍රොයිඩ් හි නවතම සංස්කරණය තවමත් රස විඳින්නේ ඉතා අඩු පරිශීලකයින් ප්‍රමාණයක් පමණි.

 ඇන්ඩ්‍රොයිඩ් හි විවිධ මෙහෙයුම් පද්ධති සංස්කරණ වල භාවිත ප්‍රතිශතයන් හි නවතම දත්තයන් ගූගල් සමාගම විසින් පසුගියදා නිකුත් කරන්නට යෙදිණි. එහිදී පෙනී ගිය කරුණක් වන්නේ ඇන්ඩ්‍රොයිඩ් හි නවතම සංස්කරණය භාවිතා කරන්නේ ඇන්ඩ්‍රොයිඩ් පරිශීලකයින් ගෙන් 13.5% ක් පමණක් බවයි. ඇන්ඩ්‍රොයිඩ් භාවිතා කරන සියළුම උපාංගයන් හි වැඩිම ප්‍රතිශතයකට හිමිකම් කියන්නේ Marshmallow (මාෂ්මෙලෝ) සංස්කරණයයි. එය ප්‍රතිශතයක් ලෙසින් 32.3% කි. Lollipop (ලොලිපොප්) සංස්කරණය ද 29.2% ප්‍රතිශතයකට හිමිකම් කියයි. මෙම දත්තයන් අනුව පෙනෙන්නට ඇති අපූරු කරුණක් වන්නේ, වසර 04 කට පෙර නිකුත් කරන ලද පැරණි ඇන්ඩ්‍රොයිඩ් සංස්කරණයක් වන KitKat (කිට්කැට්) සංස්කරණය භාවිතා කරන පරිශීලක ප්‍රමාණය නවතම සංස්කරණය වන Nougat (නෝගට්) වලට වඩා වැඩි වීමයි.  KitKat (කිට්කැට්) හි භාවිත ප්‍රතිශතය 16% කි.

Nougat (නෝගට්) සංස්කරණයට පෙර පැමිණි Marshmallow (මාෂ්මෙලෝ)  හා සැසඳීමේ දී නෝගට් සිටින්නේ ඉතා පසුගාමී තැනක බව පෙනී යයි. පසුගිය වසරේ අගෝස්තු මාසයේ දී, එනම් නෝගට් සංස්කරණය එළි දක්වන අවධියේ දී, එවකට තිබුණු නවතම මෙහෙයුම් පද්ධතිය ලෙසින් මාෂ්මෙලෝ සංස්කරණයට 15.2% ක ප්‍රතිශතයක් හිමිව පැවතිණි. වසරකට පසු තවමත් නෝගට් හිමි කර ගෙන ඇත්තේ 13.5% ක් පමණි. 

ඇපල් උපාංග හා සැසඳීමේදී iOS හි නවතම සංස්කරණයන් බහුතර උපාංග ප්‍රමාණයක් භාවිතා වන බව පෙනී යයි. නවතම iOS සංස්කරණය වන iOS 10 සංස්කරණය ඇපල් උපාංග 87% ක ධාවනය වේ. ඇන්ඩ්‍රොයිඩ් හා සැසඳීමේ දී ඇපල් උපාංග සඳහා නිතරම නවතම මෙහෙයුම් පද්ධති සංස්කරණය ලැබෙන බව නිරන්තරයෙන් පෙනී යන කරුණකි. ඒ සඳහා හේතුව වන්නේ ඇපල් උපාංගයන් හි දෘඩාංග හා මෘදුකාංග යන අංශ දෙකම ඇපල් ආයතනය විසින් පාලනය කිරීමයි. නමුත් ඇන්ඩ්‍රොයිඩ් හි මෘදුකාංග අංශය ගූගල් සමාගම මෙහෙයවූවත්, දෘඩාංග - එනම් ඇන්ඩ්‍රොයිඩ් උපාංග නිෂ්පාදනය කරන්නේ විවිධාකාර සමාගම් විසිනි. මේ සමාගම් විසින් සිය උපාංගයන් වෙත නවතම ඇන්ඩ්‍රොයිඩ් සංස්කරණය ලබා දෙන්නේ බොහෝ ප්‍රමාද වී බව පෙනීයයි. මේ නිසා ඇන්ඩ්‍රොයිඩ් උපාංගයන් හි භාවිතා වෙනස් වෙනස් සංස්කරණයි. 

ඇන්ඩ්‍රොයිඩ් හි නවතම සංස්කරණය වන Android O ලඟදීම නිකුත් වන්නට නියමිතයි. ඒ මෙහෙයුම් පද්ධති සංස්කරණයටත් පෙර කරුමයම උරුම නොවන්නට නම් ගූගල් සමාගමට නවතම මාර්ගයක් පාදා ගත යුතුව තිබේ...

 

ඔබත් ඔබේ කුඩා අවධියේ පටන්ම පරිගණකය අතපත ගාන්නට පුරුදු පුහුණු වූ අයෙක් නම් වින්ඩෝස් මෙහෙයුම් පද්ධතියේ නිත්‍ය සාමාජිකයෙක් වූ පේන්ට් මෘදුකාංගය ගැන දන්නවා ඇති. 80 දශකයේ පටන් වින්ඩෝස් මෙහෙයුම් පද්ධතිය සමග පැමිණි මේ මූලික චිත්‍රකරණ මෘදුකාංගය මේ වන විට වසර 32 ක් පැරණි බව ඔබ දන්නවාද ? කෙසේ වුවත් අපට මයික්‍රොසොෆ්ට් සමාගමෙන් ලැබෙන ආරංචි අනුව අසන්නට ලැබෙන්නේ පේන්ට් මෘදුකාංගය අවසන් ගමන් යවන්නට සැරසෙන බවයි.

වින්ඩෝස් 10 සඳහා ලබාදීමට නියමිතව ඇති මීලඟ යාවත්කාලීන සංස්කරණය වන Windows 10 Fall Creators Update හිදී මයික්‍රොසොෆ්ට් පේන්ට් මෘදුකාංගය අඩංගු නොවන බව පැවසෙනවා. ඒ අනුව වසර 32 ක් පුරා වින්ඩෝස් සමග බැඳී තිබුණු පේන්ට් හි කථාව එයින් මතු අවසන් වනු ඇති. වින්ඩෝස් හි පළමු සංස්කරණය (Windows 1.0) සමග පළමුවරට නිකුත් කරන ලද පේන්ට් මෘදුකාංගය ලොව පළමු ග්‍රැෆික් මෘදුකාංග අතරට එක්වන පුරෝගාමී මෘදුකාංගයකි.

Paint 3D

Windows 10 හි පළමු යාවත්කාලීනය වන Creators Update හිදී Paint 3D නම් නවතම මෘදුකාංගයක් හඳුන්වා දෙන්නට යෙදිණි. මෙය පේන්ට් මෘදුකාංගයේ හැකියාවන්ට වඩා වෙනස් වන නවතම මෘදුකාංගයකි. ඉදිරියේදී අපට වින්ඩෝස් සමග දකින්නට ලැබෙන්නේ Paint 3D පමණකි. Fall Creators Update එකේදී පේන්ට් මෘදුකාංගය සමගින්, අවුට්ලුක් එක්ස්ප්‍රස් හා රීඩර් යන පැරණි මෘදුකාංග දෙකට සේවයෙන් විශ්‍රාම ගැන්වීමට නියමිතව තිබේ.

පේන්ට් මෘදුකාංගය ඉතා ඉහළ හැකියාවන්ගෙන් යුතු ග්‍රැෆික් සංස්කරණ මෘදුකාංගයක් නොවේ. නමුත් පින්තූරයක් කපා කොටා ගන්නට හෝ සරල සිත්තමක් ඇඳ ගන්නට වැනි සරල වැඩ කටයුතු කීපයක් එමගින් සිදුකළ හැකිව තිබිණි. මෙය වින්ඩෝස් මෙහෙයුම් පද්ධතිය සමගම ලැබෙන නිසා වෙනත් මෘදුකාංගයක් ස්ථාපනය කිරීමකින් තොරව අදාල කටයුතු සිදු කරගත හැකිවීම අමතර වාසියක් විය. පේන්ට් වලට වඩා විශිෂ්ඨ හැකියාවන්ගෙන් යුතු ග්‍රැෆික් මෘදුකාංග රැසක් එළි දක්වා තිබුණූ නමුත්, පේන්ට් මෘදුකාංගයේ හැකියාවන් කාලයත් සමග වැඩි දියුණු කරන්නට මයික්‍රොසොෆ්ට් සමාගම කටයුතු නොකිිරීම ඔවුන්ගේ අත් වැරැද්දක් ලෙසින් අපට පෙනේ. කෙසේ වුවත් ඔෆිස් හි ක්ලිපී මෙන් ඉදිරි අනාගතයේදී පේන්ට් ගැන ද අපේ මතකය ආවර්ජනය කරන්නට කාලය එළඹ තිබේ. වින්ඩෝස් හි දීර්ඝකාලීන සගයෙක් ලෙස පේන්ට් ගැන මතකය අපේ හදවත් වල සදා රැඳෙන බව නොඅනුමානයි...

 

භාෂා ලංකා ආයතනය කියන්නේ ඔයාලා හොඳටම දන්න හෙළකුරු, මොබිටීවී, රූප වගේ ලංකාවේ ජනප්‍රියතම මොබයිල් ඇප්ස් ගොඩක් නිර්මාණය කරපු ලංකාවේ ප්‍රමුඛතම මෘදුකාංග ආයතනයයි. අවුරුදු පහක් පුරා භාෂා එක්ක එකතු වෙලා හිටපු ශ්‍රී ලාංකික ජංගම දුරකථන පරිශීලකයන්  වෙනුවෙන් මෙන්න ඒ ගොල්ලෝ අළුත් වැඩක් පටන් ගන්නයි යන්නේ... මොකක්ද ඒ ? අපි කියනවට වඩා මෙන්න අහන්න... භාෂා ලංකා ආයතනය මේ ගැන කියලා තියෙන්නේ මෙන්න මෙහෙමයි... 

සැම්සුන් සමාගමේ නවතම නිෂ්පාදනය ලෙස එළි දක්වන්නට නියමිත Samsung Galaxy Note 8 උපාංගය වෙළඳපොලට නිකුත් කරන දිනය නිළ වශයෙන් ප්‍රකාශයට පත්වී තිබෙනවා. ඒ අනුව මෙතෙක් කලක් ඒ වෙනුවෙන් බලා සිටි Galaxy Note පාරිභෝගිකයන් හට දැන් තවත් මාසයක පමණ කාලයකින් පසු තමන්ගේ ප්‍රියතම උපාංගයේ නවතම සංස්කරණය මිලට ගැනීමට හැකියි. සැම්සුන් සමාගම නිළ වශයෙන් ප්‍රකාශ කර සිටියේ ලබන අගෝස්තු මාසයේ 23 වැනි බදදා දින Galaxy Note 8 උපාංගය එළි දක්වන බවයි.

ගැලැක්සි S8 මාදිලියේ අනෙකුත් උපාංගයන් හි හැඩරුව හා නිර්මාණ සංකල්පයන් අනුව යමින් Galaxy Note 8 උපාංගය ද සැලසුම් කර ඇත. ඒ අනුව අනෙක් S8 උපාංගයන් මෙන්ම  Infinity Display ලෙසින් හැඳින්වෙන දාර රහිත දර්ශණ තිරයකින් ද, උපාංගයේ ඉදිරිපස හා පසුපස යන දෙපැත්තේම වීදුරු වලින් නිර්මාණය කර තිබීම ද, උපාංගයේ පසුපස කොටසේ රඳවනු ලබන ඇඟිලි සටහන් කියවීමේ සංවේදකය ද අපට මෙම Galaxy Note 8 උපාංගයේ දීද බලාපොරොත්තු විය හැකියි.

Galaxy S8 හා Galaxy S8+ යන උපාංගයන් ගෙන් Note 8 උපාංගය වෙනස් වන්නේ ඒ හා අඩංගු කර ඇති S-Pen නම් සහායක උපාංගය නිසායි. මෙය පෑනක් මෙන් තිරය මත ඇඳිය හැකි ආකාරයෙන් නිර්මාණය කර තිබේ. Note 8 උපාංගය ජනප්‍රිය වන්නට බලපෑ ප්‍රධාන හේතුවක් වන්නේ ද මේ S-Pen එකයි. එසේම Note 8 හි අඟල් 6.3 ක දැවැන්ත තිරයත්, පසුපස ද්විත්ව කැමරා පිහිටුවා තිබීම හා Snapdragon 836 මාදිලියේ වඩාත් බලගතු ප්‍රොසෙසරයකින් බල ගැන්වීමත් යන කාරණා S8 පවුලේ අනෙකුත් උපාංගයන්ට වඩා Note 8 උපාංගය සුවිශේෂී වීමට හේතු කාරණා වී තිබේ.

මීට පෙර එළි දැක්වූ ගැලැක්සි S7 උපාංගය අධික ලෙස රත් වී පුපුරා යෑම හා ගිනි ගැනීම ආදී කාරණා නිසා පලුදු වී තිබුනු පාරිභෝගික විශ්වාසය නැවතත් දිනා ගැනීමට මෙම නව Galaxy Note 8 උපාංගය සමත් වෙනු ඇතැයි යන්න අපේ විශ්වාසයයි...

ලෝකයේ වැඩිම ලාභ ලබන තාක්ෂණික සමාගම වන්නේ ඇපල් සමාගමයි. නමුත් ඉතා කෙටි කාලයක් ඇතුළත ඇපල් පරදා ඒ තැන ගන්නට සැම්සුන් සමාගම සමත් වන ලකුණු පෙනේ. දකුණු කොරියානු තාක්ෂණික දැවැන්තයා වූ සැම්සුන් සමාගම, ලෝකය පුරාම තම අණසක පතුරා සිටින්නේ විවිධ තාක්ෂණික උපාංග නිෂ්පාදනය කරන සමාගමක් ලෙසිනි. සිය නිෂ්පාදන මගින් පසුගිය කාර්තුවේ ලාභය ලෙස වොන් ට්‍රිලියන 14 ක් (ඇමෙරිකානු ඩොලර් බිලියන 12.1) ක් උපයා ගැනීමට ඔවුන් සමත් ව ඇත. මෙය පසුගිය අවුරුද්දේ අදාල කාල සීමාවට අදාලව සැසඳීමේදී 72% ක වර්ධනයකි. ඇපල් සමාගම විසින් එම කාල සීමාවේදී උපයා ගෙන ඇති ලාභය වන්නේ ඇමෙරිකානු ඩොලර් බිලියන 10.6 කි.

ඉදිරියේදී නිකුත් කිරීමට නියමිත iPhone 7S හා iPhone 8 උපාංග වෙළඳපොලට නිකුත් කිරීමෙන් පසු ඇපල් සමාගමේ ලාභය තවත් ඉහළ යනු ඇත. ඒ සමගින් ඇපල් සමාගමේ ලාභය සැම්සුන් හි ලාභය හා සමවෙනු ඇතැයි පෙනෙනු ඇත. නමුත් ඇත්තෙන්ම ඇපල් සමාගමේ නිෂ්පාදන වැඩි වැඩියෙන් විකිණීම යනු සැම්සුන් සමාගමේ ලාභය වැඩි වීමකි. ඇපල් උපාංග සඳහා ප්‍රොසෙසර, මෙමරි චිප් හා දුරකතන තිර ආදී සහායක උපාංග ලබාගන්නේ සැම්සුන් සමාගමෙනි. එම නිසා ඇපල් හි ලාභය වැඩි වීම යනු වක්‍රාකාරව සැම්සුන් හි ලාභය වැඩිවීමකි.

ස්මාට් දුරකථන වෙළඳාමට වඩා සැම්සුන් සමාගමට ලාභ ගෙන එන්නේ ප්‍රොසෙසර, මෙමරි චිප් හා දුරකතන තිර ආදිය නිෂ්පාදනය කිරීමයි. එය දළ වශයෙන් 60% කි. ජංගම දුරකථන නිෂ්පාදක සමාගම් රැසක් බිහි වී තිබුණත් ඒ සඳහා අවශ්‍ය අංගෝපාංග නිෂ්පාදනය කරන්නේ සැම්සුම් සමාගම ඇතුළු නිෂ්පාදන සමාගම් කීපයක් පමණි. විශේෂයෙන්ම OLED තිර නිෂ්පාදනයේ ප්‍රමුඛ ස්ථානය ලබා සිටින්නේ සැම්සුන් සමාගමයි. OLED අංශයෙන් ද විශාල ලාභයක් සැම්සුන් සමාගම උපයා ගනී.


ඇපල් සමාගමේ ලාභාංශ පරදවමින් ලෝකයේ වැඩිම ලාභයක් උපයන සමාගම වීම සැම්සුන් සමාගමට නම් උදම් වීම කාරණයකි. ඒ ඇමෙරිකානු ආධිපත්‍යය අභිබවා යමින් ආසියානු තාක්ෂණික සමාගමක් වශයෙන් සැම්සුන් සමාගමේ නැගී සිටීම සුවිශේෂී වන නිසායි...

 

ඉන්ටෙල් සමාගම විසින් හඳුන්වා දෙනු ලැබූ නවතම ප්‍රොසෙසර කාණ්ඩය වන Core i9 හි 7900X මාදිලියේ ප්‍රොසෙසරයක් ඉතා ඉහළ ඝටිකා වේගයකට (clock speed) Overclock කර වාර්තාවක් පිහිටුවන්නට පසුගියදා සමත් වුනා. Core i9-7900X ප්‍රොසෙසර මාදිලියේ core 10 ක් ඇති අතර මෙම ප්‍රොසෙසරයේ සම්මත වේගය වන 3.3GHz ඉක්මවා ගොස්  6 GHz  (6,016MHz) දක්වා වූ දැවැන්ත වේගයක් ප්‍රොසෙසරයට ලබා දෙන්නට මෙම Overclock කිරීමේදී හැකියාව ලැබී තිබෙනවා. මෙම 6 GHz clock speed එක මේ කාණ්ඩයේ ප්‍රොසෙසර සඳහා වන නව Overclocking වාර්තාව බවට පත්වී තිබේ.

ද්‍රව නයිට්‍රජන් (LN2) උපයෝගී කර ගනිමින් ගොඩ නැංවූ සිසිලන පද්ධතියක් (cooler) මේ Overclock කිරීම සඳහා යොදා ගෙන තිබෙනවා. මෙහිදී පහත දැක්වෙන දෘඩාංග සැකසුම යොදා ගෙන තිබේ.

• 4GB G.Skill Trident Z DDR4 මතකය
• Gigabite X299 SOC Champion මව් පුවරුව
• 120GB Neutron GTX SSD හාඩ් ඩිස්කය
• Corsair Professional Gold Series 1500W බල සැපයුම

CPU-Z මෘදුකාංගය මගින් එම අවස්ථාවේදී ලබාගත් තිර රූපයක් පහත දැක්වේ...

 

ප්‍රොසෙසර යුද්ධය ලෙසින් හැඳින්වෙන්නේ ප්‍රොසෙසර චිප් නිෂ්පාදනය කරන ප්‍රමුඛතම සමාගම් දෙක වන Intel හා AMD සමාගම් අතර ඇති වෙළඳපොල තරඟයටයි. පුද්ගල පරිගණක සඳහා මයික්‍රො ප්‍රොසෙසර නිපදවන ආයතන අතරින් නිතරඟයෙන්ම පළමු තැන හිමිව ඇත්තේ ඉන්ටෙල් සමාගම හටයි. නමුත් දැන් දැන් පෙනෙන්නට ඇති කරුණ වන්නේ මේ ක්ෂේත්‍රයේ කිරුළ හිමි ඉන්ටෙල් හට සිය මුල් තැන රැක ගැනීම සඳහා AMD සමාගම සමග තරඟ කරන්නට සිදුව ඇති බවයි. ඊට හේතුව වන්නේ මෑත කාලීනව AMD සමාගම ප්‍රොසෙසර නිර්මාණය අතින් ඉන්ටෙල් හා කරට කර යන තරමේ දියුණුවකට පැමිණ තිබීමයි.

මේ අවුරුද්දේ මුල් කාර්තුවේ දී AMD සමාගම තමන්ගේ නවතම සුපිරි ප්‍රොසෙසරය Ryzen (රයිසන්) නමින් නිකුත් කළ අතර, එ් වෙද්දී වෙළඳපොලට නිකුත් කර තිබුණු ඩෙස්ක්ටොප් වර්ගයේ කිසිදු ඉන්ටෙල් ප්‍රොසෙසරයකට Ryzen සමග තරඟ කළ නොහැකි විය. එතෙක් කල් සටනක් නැතිව රජ වූ ඉන්ටෙල් සමාගමට AMD සමාගම විසින් Ryzen ප්‍රොසෙසරය නිකුත් කිරීමත් සමග නැවතත් කිරුළ සඳහා තරඟ වදින්නට සිදුවිය. Ryzen ප්‍රොසෙසරය ඉතා අනර්ඝ තත්ත්වයේ ප්‍රොසෙසරයක් ලෙසින් ක්ෂේත්‍රයේ අගය කිරීමට ලක්වූ අතර, AMD නිෂ්පාදන නාමය කෙරෙහි තරමක අඩු අගයක පැවතුනු වෙළඳපොල පිළිගැනීම යලිත් වරක් ඉහළටම ඔසවා තබන්නට Ryzen සමත් වීම කැපී පෙනේ.

Ryzen හි සාර්ථකත්වයත් සමගම ඉන්ටෙල් සමාගම වහාම ක්‍රියාත්මක වන්නට විය. ඔවුන් විසින් Ryzen හා තරඟයට නවතම ප්‍රොසෙසර කාණ්ඩයක් ඉදිරිපත් කරන ලදී. පසුගිය මාසයේ නිකුත් කළ Intel Core X මාදිලියේ ප්‍රොසෙසර පෙළ සමගින් ඉන්ටෙල් සමාගම නැවතත් සිය මුල් තැන ලබා ගත් අයුරු අපට දක්නට ලැබිණි. කෙසේ වෙතත් මිළ අනුව සැසඳීමේදී නම්, නැතහොත් ගෙවන මිලට ලැබෙන අගය අනුව Core X වලට වඩා Ryzen ඉදිරියෙන් සිටින බව පෙනෙන්නට තිබේ.

AMD විසින් Ryzen නිකුත් කළ විට, ඒ හා තරඟයක් දෙන්නට Core X ප්‍රොසෙසර සූදානම් ව තිබීම ඉන්ටෙල් හි වාසියට වූ දෙයකි. එසේ නොවූවා නම්, Ryzen විසින් ප්‍රොසෙසර ක්ෂේත්‍රයේ සෑහෙන වෙනසක් සිදු කරන්නට තිබිණි. ඉන්ටෙල් සමාගම යාන්තම් ජාමෙ බේරාගත් බව මෙහිදී පැහැදිලිව පෙනෙන සත්‍යයකි. කෙසේ වුවත් AMD වෙතින් කරට කර සටනක් ලැබෙන නිසා දැන් ඉන්ටෙල් සමාගම සිය සැලසුම් වෙනස් කර ඇති බව පෙනෙන්නට තිබේ. ඊලඟ පරපුරේ core ප්‍රොසෙසර නිෂ්පාදනය සඳහා දැන් ඉන්ටෙල් සමාගම කටයුතු කරගෙන යන බව අසන්නට ලැබේ. මීලඟ දශකයේ එළි දකින නවතම උපාංග සඳහා පෙරළිකාර නව ප්‍රොසෙසරයක් ඉන්ටෙල් නාමය යටතේ එළි දැක්වීම ඔවුන්ගේ බලාපොරොත්තුවයි.

මේ අවස්ථාව වන විට බොහෝ කාලයකට පසු ප්‍රොසෙසර වෙළඳපොල යලිත් උණුසුම් ව තිබේ. මේ තරඟය පාරිභෝගිකයන් වශයෙන් අපට නම් ඉතා වාසිදායක බව නම් කිව යුතුය. ඉන්ටෙල් සමාගම විසින් පෙරළිකාර ප්‍රොසෙසරයක් නිපදවන්නට සැලසුම් කරද්දී, AMD සමාගම ඔවුන්ගේ Zen ආකෘතිය යටතේ වන දෙවැනි ප්‍රොසෙසර සංස්කරණය නිපදවමින් සිටී. මේ සියල්ල සැලකීමේදී ප්‍රොසෙසර ක්ෂේත්‍රයේ ඉදිරි කාලය ඉතා ආකර්ශණීය වනු ඇතැයි යන්න අපේ බලාපොරොත්තුවයි...

ආරම්භයේ සිටම අන්තර්ජාල බ්‍රවුසර් අතර පෙරමුණේ සිටියේ මයික්‍රොසොෆ්ට් සමාගමේ මුල් කාලීන බ්‍රවුසරය වූ ඉන්ටර්නෙට් එක්ස්ප්ලෝරර් බ්‍රවුසරයයි. වින්ඩෝස් මෙහෙයුම් පද්ධතිය සමග පැමිණි ඉන්ටර්නෙට් එක්ස්ප්ලෝරර් බහුතරයකගේ එකම තේරීම විය. නමුත් කාලයත් සමග එක්ප්ලෝරර් බ්‍රවුසරයට තරඟකරුවන් බිහිවිය. නෙට්ස්කේප් නැවිගේටර්, සෆාරි හා ෆයර්ෆොක්ස් යනු එසේ තරඟ කළ මුල් කාලීන බ්‍රවුසර කීපයකි.

කෙසේ වුවත් ගූගල් සමාගම විසින් ක්‍රෝම් බ්‍රවුසරය හඳුන්වා දීමෙන් පසු එය දිනෙන් දිනම ජනප්‍රිය වන්නට පටන් ගත් අතර ස්වල්ප කාලයකින්ම ඉන්ටර්නෙට් එක්ස්ප්ලෝරර් අභිභවා යමින්, අන්තර්ජාල බ්‍රවුසර යුද්ධයෙන් ජය ලබන්නට සමත් විය. එදා සිට අද දක්වාම ක්‍රෝම් හි කිරුළට අභියෝග කරන්නට කිසිදු බ්‍රවුසරයකට හැකිවී නැත.

පසුගියදා නිකුත් වූ නවතම අන්තර්ජාල සමීක්ෂණ වාර්තා අනුව අන්තර්ජාල බ්‍රවුසර භාවිතාවයෙන් 60% ක් අයත් වන්නේ ක්‍රෝම් බ්‍රවුසරයට යි. පුද්ගලික පරිගණක (PC) වලින් 90 කටත් වඩා භාවිතා කරන්නේ වින්ඩෝස් මෙහෙයුම් පද්ධතිය වුවත්, මයික්‍රොසොෆ්ට්  හි එජ් (Edge) බ්‍රවුසරයට හිමිව ඇත්තේ 5% ක භාවිත ප්‍රතිශතයක් පමණි. නමුත් මයික්‍රොසොෆ්ට් හි පැරණි බ්‍රවුසරය වන ඉන්ටර්නෙට් එක්ස්ප්ලෝරර් දෙවැනි තැන පසුවන්නේ 16% ක භාවිත ප්‍රතිශතයක් හිමි කර ගනිමිනි...

ෆේස්බුක් කියන්නේ අපිට නැතුවම බැරි සේවාවක්. අන්තර්ජාල ප්‍රජාව අතර දිනකට එක් වරක් හෝ ෆේස්බුක් භාවිතා නොකරන අයෙක් සොයා ගන්නට අපහසුයි. සමාජ-ජාල සේවාවන් අතර ප්‍රථමයා මෙන්ම ප්‍රමුඛයා වන්නේ ද ෆේස්බුක් සේවාවයි. මේ වන විට හුදෙක්ම වෙබ් අඩවියක් හෝ සමාජ-ජාලයක් යන තැනින් ඔබ්බට ගොස්, අන්තර්ජාල සේවාවක් ලෙසින් ෆේස්බුක් ඉදිරියට පැමිණ තිබේ. ෆේස්බුක් සමාජ-ජාලය ගැන මෑතකදී අසන්නට ලැබුණු අළුත්ම පුවත් දෙකක් ඔබ වෙතට ගෙන එන්නයි මේ සූදානම...

මුලින්ම පවසන්නට යන්නේ ෆේස්බුක් හි තවත් ජයග්‍රාහි කඩඉමක් පිළීබඳවයි. ෆේස්බුක් ජාලයේ මාසික සක්‍රිය පරිශීලක ප්‍රමාණය බිලියන දෙකක සීමාවට ලඟා වූ බව අපට අසන්නට ලැබුණා. ෆේස්බුක් ප්‍රධානී මාක් ෂුකර්බර්ග් ෆේස්බුක් පණිවුඩයක් මගින් ඒ බව ලොවට ප්‍රකාශ කරන්නට යෙදුණා.

"ෆේස්බුක් හි සක්‍රීය සාමාජිකයින් ගණන බිලියන දෙකක් කරා ලඟා වූ බව නිල වශයෙන් දැනුම් දෙමි. ලෝකයම එකට සම්බන්ධ කරන්නට අපි පාර තැනුවෙමු... දැන්, අපි ලෝකය තවත් කිට්ටු කරවන්නට කටයුතු කරමින් සිටින්නෙමු... ඔබ සමගින් මේ යන මේ ගමන මට මහත් ගෞරවයකි..." යනුවෙන් මාක් ෂුකර්බර්ග් සඳහන් කර තිබිණි.

ෆේස්බුක් සේවාව 2004 වර්ශයේදී ආරම්භ වූ අතර බිලියනක සාමාජික ප්‍රමාණයට ලඟාවීමට වසර 08 ක් ගතවිය. 2012 දී බිලියනයේ සීමාව පසුකළ ඔවුන් බිලියන 1.5 සීමාව වෙත 2015 දී ලඟා වූ අතර බිලියන 2 සීමාව වෙත 2017 ජුනි මාසයේ දී ලඟාවීමට සමත් වූහ. ෆේස්බුක් සමාජ-ජාලයට අමතරව, ෆේස්බුක් ආයතනය සතු අනෙකුත් සේවාවන් වන මැසෙන්ජර් (Messenger) සේවාව හා වට්ස්ඇප් (WhatsApp) සේවාවන් ද පරිශීලයින් බිලියනක සීමාව පසු කරන්නට සමත් වී තිබේ.

---

දෙවන පුවතින් අප පවසන්නට සැරසෙන්නේ ෆේස්බුක් ආයතනය විසින් සැලසුම් කරමින් යන නවතම වැඩ පිළිවෙලක් පිළිබඳවයි. ඒ අනුව ඉදිරියේදී ෆේස්බුක් ආයතනය විසින් රූපවාහිනී කථා මාලා නිෂ්පාදනය සඳහා සිත යොමුකර ඇති බව අසන්නට ලැබෙනවා. හොලිවුඩ් හි ප්‍රධාන පෙළේ චිත්‍රාගාර, නිෂ්පාදන ආයතන සහ නියෝජිත ආයතන සමගින් මේ පිළිබඳව අවශ්‍ය වන නිළ සාකච්ඡා මේ වන විටත් පවත්වා අවසන් අතර එහිදී ධනාත්මක ප්‍රතිචාර ලැබී ඇති බවයි සඳහන් වන්නේ. ඒ අනුව Netflix හා Hulu වැනි ස්ට්‍රීමින් (Streaming) සේවාවන් මෙන් ඉදිරියේදී ෆේස්බුක් ඔස්සේද ටීවී සීරීස් හෙවත් ටෙලි කථා මාලා නැරඹීමට හැකිවනු ඇත.

එක් කථාංගයක් සඳහා ෆේස්බුක් ආයතනය විසින් ඩොලර් මිලියන 03 ක් වැනි ඉහළ මුදලක් ගෙවීමට එකඟ වී තිබේ. අවුරුදු 13 ත් 34 ත් අතර ප්‍රේක්ෂක පිරිස ෆේස්බුක් ආයතනයේ ඉලක්කය වී තිබේ. විශේෂයෙන්ම 17-30 වයස් කාණ්ඩය කෙරෙහි ඔවුන්ගේ සුවිශේෂී අවධානයක් යොමු කර තිබේ. පවුලේ සැමට එකට සිට නැරඹිය හැකි අන්තර්ගතයන් ෆේස්බුක් ස්ට්‍රීමින් සේවාව මගින් ලබාදෙනු ඇති අතර ඒවා දේශපාලනික හෝ ප්‍රවෘත්තිමය අගයයන්ගෙන් තොර, එමෙන්ම නිරුවත් දර්ශණ හෝ අසභ්‍ය වදන් වලින් තොර වූ ඒවා වනු ඇතැයි බලාපොරොත්තු පළවේ.

දැනටමත් ටෙලි කථාංග දෙකක් ෆේස්බුක් ස්ට්‍රීමින් සේවාව වෙත එක්කර තිබේ. ස්ට්‍රේන්ජර්ස් (Strangers) හා ලාස්ට් ස්ටේට් ස්ටෑන්ඩින් (Last State Standing) යන කථා මාලා දෙකයි. මේ වසර අවසානයට පෙර ෆේස්බුක්  ඔස්සේ ටීවී සීරීස් නැරඹීමටත් අවස්ථාවක් ලැබෙනු ඇතැයි බලාපොරොත්තු තබා ගත හැකි බව පෙනේ.

 

ගූගල් සමාගමේ ජනප්‍රියතම දුරකථන නිෂ්පාදනයක් වන ගූගල් පික්සල් (Google Pixel) උපාංගයේ දෙවැනි සංස්කරණය වශයෙන් Google Pixel 2 මේ වසර අවසාන භාගයේදී නිකුත් කිරීමට නියමිතව ඇත. ගූගල් සමාගම විසින් මේ සම්බන්ධයෙන් විශේෂයෙන් සඳහන් කර නැතත්, අන්තර්ජාලයේ පළවී ඇති යම් යම් තොරතුරු අනුව Google Pixel 2 සම්බන්ධ ඉඟි කීපයක් දැන ගන්නට ලැබී තිබේ. මේ අනුව HTC සමාගම විසින් Pixel 2 හා Pixel XL 2 උපාංගයන් නිෂ්පාදනය කරනු ඇත. පසුගිය වසරේ එළි දැක්වුනු පෙරළිකාර Pixel උපාංගයන් ද නිෂ්පාදනය කරන ලද්දේ HTC සමාගම විසිනි.

අන්තර්ජාල තොරතුරු හා නිෂ්පාදන සමාගම් වල අභ්‍යන්තර තොරතුරු ඔස්සේ ඔත්තු සොයා යන ඉඟි සපයන්නන් විසින් අදාල දත්ත ගබඩා වල ඇති S2 හා M2 යන නමින් හඳුන්වන උපාංග දෙකකට අදාල දත්ත සොයාගෙන ඇත. මේවා Pixel 2 හා Pixel XL 2 උපාංගයන් සඳහා අදාල කේත නාම ලෙස සැක කර ඇත. පෙර නිකුත් වූ Pixel පළමු සංස්කරණය සඳහා මේ කේත නාම දැක්වුනේ S1 හා M1 ලෙසින් වන බැවින් මේ උපකල්පනය සාධාරණ බව පෙනී යයි.

අළුත් පික්සල් උපාංගයන් සඳහා Qualcomm Snapdragon 835 චිප් එක යොදා ගනු ඇති බව සඳහන් වේ. මේ ආරංචි මාර්ග වලට අනුව Pixel XL 2 උපාංගයේ අඟල් 5.6 ක තිරයක් ඇති බව පෙනී යයි. එහි තිර විභේදනය පික්සල් 2560x1312 කි. එසේම Pixel XL 2 උපාංගයේ 4GB Ram මතකයක් අඩංගු වනු ඇතැයි පැවසේ.

තවත් ආරංචි මාර්ගයකින් පැවසුනේ ගූගල් සමාගම විසින් මෙවර වෙනස් මාදිලි වලින් පික්සල් උපාංග තුනක් නිකුත් කරන්නට සැලසුම් කර ඇති බවයි. එහිදී උපාංග දෙකක් HTC සමාගම විසින් ද, අනෙක LG සමාගම විසින් ද නිපදවනු ඇතැයි පැවසේ. කෙසේ වෙතත් මෙහි සත්‍ය අසත්‍යභාවය ගැන නම් සහතික විය නොහැකියි. ගූගල් සමාගමේ ප්‍රකාශකයෙක් මාර්තු මාසයේ දී පවසා සිටියේ 2017 වසර අවසාන භාගයේ දී නවතම ඇන්ඩ්‍රොයිඩ් සංස්කරණය වන Android O සමගින් පික්සල් උපාංගයන් හි නව සංස්කරණයන් ද නිකුත් කරන්නට අදහස් කරන බවයි...

මාස ගණනාවක් තිස්සේ තිබුණු අර්බුධකාරී තත්ත්වය අවසන් කරමින්, අවසානයේදී ඌබර් (Uber) සමාගමේ ප්‍රධාන විධායක නිළධාරියා වන ට්‍රැවිස් කැලැනිච් එම තනතුරෙන් ඉල්ලා අස් වී ඇති බව වාර්තා වේ. ඌබර් ටැක්සි සේවාව මොබයිල් පාදක කරගත් ලොව ප්‍රමුඛතම කුලී රථ සේවාවයි.  වර්තමාන ලෝකයේ ප්‍රමුඛතම තාක්ෂණික සේවා සමාගමක් ලෙස පෙරට පැමිණි Uber සමාගමේ මේ අර්බුධය එහි අනාගතයට අහිතකර ලෙස බලපානු ඇති දැයි විචාරකයින් සැක පළ කරයි.

ට්‍රැවිස් කැලැනිච් හා  Uber සමාගමේ නිළධාරින් අතර කලක පටන්ම මත ගැටුම් පැවතිණි. ඔහු පසුගිය සතියේ සිට නිවාඩු ලබා සිටියේ සිය මව හදිසියේම බෝට්ටු අනතුරකින් ජීවිතක්ෂයට පත්වීම නිසායි. Uber හවුල්කාර කොටස් හිමියන් ට්‍රැවිස් ගේ පාලනය පිළිබඳ නොසතුටින් සිටි අතර ඔහුට ප්‍රධාන විධායක නිළධාරි ධූරයෙන් ඉවත් වීමට බලපෑම් කළ නමුත් ට්‍රැවිස් ඒ සඳහා දැක්වූයේ සතුටුදායක ප්‍රතිචාරයක් නොවේ. කෙසේ වෙතත් අවසානයේදී අධ්‍යක්ෂක මණ්ඩලයේ කැමැත්තට ඉඩ දී ඔහු ඉල්ලා අස්වීමට තීරණය කර ඇත. ඔහු අධ්‍යක්ෂක මණ්ඩල සාමාජිකයෙක් ලෙස තව දුරටත් රැඳී සිටින බව Uber සමාගම විසින් ප්‍රකාශ කර තිබේ.

"මගේ ජීවිතයේ අන් කිසිදු දෙයකට වඩා මම Uber සමාගමට ආදරෙයි... මම දැන් පසුවන අසීරු අවස්ථාවේ දී වුවත් ආයෝජකයින්ගේ ඉල්ලීම පරිදි මම තනතුරින් ඉල්ලා අස්වන්නේ සමාගමේ අනාගතය සලකා බලමින්... අරගල මැද සිටිනවාට වඩා මෙම තීරණය සමාගම පැත්තෙන් යහපත් එකක් වේවි... " යැයි ට්‍රැවිස් කැලැනිච් පවසා තිබිණි.

Uber සමාගම මේ පසුගිය වසර 08 ක පමණ කාලය තුල දී දැවැන්ත සමාගමක් ලෙසින් ඉදිරියට පැමිණි අතර එහි වෙළඳපොල වටිනාකම ඩොලර් බිලියන 14 කට අධික වේ. ප්‍රවාහන ක්ෂේත්‍රයේ තවත් දැවැන්ත නවීකරණයන් සඳහා ඔවුන් මේ වන විටත් සැලසුම් කරමින් සිටී. ඒ අතරින් ස්වයංක්‍රීයව ධාවනය වන කාර් රථ ටැක්සි සේවාවන් ආරම්භ කිරීමේ පර්යේෂණ මේ වන විටත් සිදු වෙමින් පවතී...

අපේ එදිනෙදා ජීවිතයේ සෑම සියලු දෙයකටම අපට සහය වන ගූගල් සෙවුම් යන්ත්‍රය දැන් තවත් අලුත් සේවාවක් හඳුන්වා දී තිබේ. ඒ රැකියාවක් සොයන අයට වඩාත් පහසුවෙන් තමන්ට අවශ්‍ය රැකියාව සොයා ගැනීමට Google for Jobs නම් සේවාව දියත් කිරීමයි.

මෙය ගූගල් හි වැඩිදියුණු කරන ලද සෙවුම් ප්‍රතිඵල සේවාවකි. එමෙන්ම මේ සඳහා ස්වයංක්‍රීය කෘතිම බුද්ධි වැඩසටහන් උපයෝගී කර ගෙන තිබේ.  Google's Cloud Jobs API නම් තාක්ෂණයද මේ සඳහා යොදාගෙන තිබේ. රැකියා බලාපොරොත්තු වන අය සහ සේවායෝජකයන් අතර වඩාත් හොඳ සම්බන්ධතාවයක් මෙමගින් ගොඩ නැගෙනු ඇතැයි ගූගල් සමාගම බලාපොරොත්තු වෙයි.

රැකියා සඳහා සෙවුම් කිරීමේ මේ සේවාව දැන් ඉංග්‍රීසි භාෂාවෙන් පමණක් ඩෙස්ක්ටොප් හා මොබයිල් උපාංග සඳහා ලබාගත හැකියි. "jobs near me" හෝ "teaching jobs" වැනි සෙවුම් වදනක් භාවිතා කරමින් ඔබට රැකියා සඳහා සෙවුම් කළ හැකියි. Google for Jobs සේවාව මගින් ඔබට වඩාත් ගැඹුරු ලෙස හා ඔබට අවශ්‍ය ලෙසට සැකසුම් කරමින් රැකියා සෙවිය හැකිවීම විශේෂ පහසුවකි.

රැකියා අවස්ථා ලබාදීම සඳහා ගූගල් සමාගම විවිධ සමාගම් රැසක් සමගින් සම්බන්ධ වී ඇත. LinkedIn, Monster, WayUp, DirectEmployers, CareerBuilder, Glassdoor, Facebook යනු එයින් සමාගම් කීපයක් පමණි. ඉදිරියේදී මේ සේවාව තවත් පුළුල් කිරීමටත්, තවත් පහසු කිරීමටත් ගූගල් සමාගම බලාපොරොත්තු වේ.

Google for Jobs පිළිබඳව පහත වීඩියෝවෙන් තවත් විස්තර දැකගත හැකිවනු ඇත...

මයික්‍රොසොෆ්ට් සමාගම යනු මෘදුකාංග නිර්මාණ ආයතනයක් පමණක්ම නොවේ. ඔවුන් විසින් කලින් කලට අපූරු තාක්ෂණික උපාංගයන් ද නිෂ්පාදනය කරනු ලබයි. ඒවායින් සුප්‍රසිද්ධම උපාංගය වන්නේ Xbox වීඩියෝ කන්සෝලයයි. පසුගියදා ඔවුන් සිය නවතම නිර්මාණය වෙළඳපොලට හඳුන්වා දෙනු ලැබුවා. එය මොඩර්න් කීබෝඩ් (Modern Keyboard) ලෙසින් හඳුන්වා දී ඇති අතර මෙහි ඇති විශේෂත්වය වන්නේ මෙම නවතම යතුරු පුවරුවට ඇඟිලි සළකුණු හඳුනාගත හැකි Fingerprint Sensor එකක් ඇතුළත් කර තිබීමයි.

මෙම ඇඟිලි සළකුණු සංවේදකය බැලු බැල්මට නොපෙන්නේ එය තවත් එක් key එකක් ආකාරයෙන් නිර්මාණය කර තිබීම නිසායි. Alt, Ctrl, Shift යතුරු තුනට මැදිවන ලෙස, තවත් එක් අතිරේක key එකක් ලෙසින් මෙම Fingerprint Sensor එක ස්ථානගත කර තිබේ. යතුරු පුවරුවේ අනෙකුත් ඕනෑම යතුරක් ඔබන ආකාරයෙන් මෙයද ඔබට press කළ හැකියි. එවිට ඔබ රහස් පද (Password) ඇතුලත් කරන ඕනෑම තැනකදී මෙම තනි key එක එබීම පමණක් සෑහේ. මේ නිසා රහස් පද මතක තබා ගැනීම හා ඒවා එකින් එක ටයිප් කිරීම යන කරදරයෙන් මිදී ක්ෂණිකව හා ආරක්ෂාකාරීව පරිගණක දත්ත අගුලු දැමීමට හා ඇරීමට ඔබට හැකියාව ලැබේ.

Modern Keyboard එක හැඩයෙන් ඉතා සිහින් වුවත්, ශක්තිමත් ආකාරයෙන් නිමවා ඇති බව පෙනේ. මෙය අවශ්‍ය නම් USB කේබලයක් මගින් පරිගණකය හා සම්බන්ධ කළ හැකි නමුත්, බ්ලූටූත් ආකාරයට (Bluetooth LE) රැහැන් රහිතව හා දුරස්ථව භාවිතා කළ හැකිවීම විශේෂත්වයකි. මේ ආකාරයෙන් රැහැන් රහිතව වැඩ කිරීමේදී Modern Keyboard හි බැටරිය මාස 04 ක් පමණ කාලයක් භාවිතා කළ හැකි බව මයික්‍රොසොෆ්ට් සමාගම පවසා සිටී. මෙය රැහැන් රහිතව අඩි 17 ක (5 m) දුරක් සඳහා සහාය දක්වයි. මෙවැනි විශේෂාංග වලින් යුතු වුවත්, Modern Keyboard එකෙහි ඇති එක් අවාසියක් වන්නේ මෙය දැනට සහාය දක්වන්නේ වින්ඩෝස් 10 සඳහා පමණක් වීමයි. Mac, iOS හා Android පරිශීලයන් මෙන්ම පැරණි වින්ඩෝස් සංස්කරණ භාවිතා කරන පරිශීලකයන්ට Modern Keyboard එක අත් විඳින්නට ඇති අවස්ථාව මේ නිසා අහිමි වී යයි.


මයික්‍රොසොෆ්ට් සමාගම විසින් තවමත් මෙය නිකුත් කරන දිනය ගැන සඳහන් කර නොමැත. කෙසේ වුවත් මෙහි මිළ ඇමෙරිකාන් ඩොලර් 129.99 ක් (ආසන්න වශයෙන් රුපියල් 20,000/- ක් !!!) ලෙසින් දක්වා තිබේ. Modern Keyboard පිළිබඳ විස්තර ඔබට පහත වීඩියෝවෙන් නැරඹිය හැකියි...

ස්ලැක් යනු ව්‍යාපාරික ලෝකයේ ජනප්‍රිය පණිවුඩ හුවමාරු කරගන්නා මෘදුකාංගයකි. බොහෝ ව්‍යාපාර ආයතනයන් ස්ලැක් භාවිතා කර සිය දෛනික කාර්යාලීය තොරතුරු හුවමාරු කර ගන්නා අතර එය කාර්යාලීය කාර්යක්ෂමතාවයට ද හේතු වී තිබේ. ස්ලැක් මෘදුකාංගය කුඩා මෘදුකාංග සමාගමක් වන අතර එය මේ වන විට අත් කරගෙන ඇති ජනප්‍රියභාවය හා ව්‍යාපාර ලෝකයේ අත්කර ගෙන ඇති බලපෑම නිසා මෘදුකාංග ලෝකයේ දැවැන්ත සමාගම් කීපයක්ම දැන් ස්ලැක් කෙරෙහි ඇස ගසා ගෙන සිටින බව නොරහසක්.

මේ වන විට ස්ලැක් හි වෙළඳපොළ වටිනාකම ඇමෙරිකානු ඩොලර් බිලියන 3.8 ක් පමණ වේ. පසුගිය වසරේ මයික්‍රොසොෆ්ට් සමාගම ස්ලැක් මිලදී ගන්නට ඉතා ආසන්නම සිටි නමුත් ඒ ගනුදෙනුව සිදු නොවීය. කෙසේ වෙතත් ඩොලර් බිලියන 8 ක් ලෙස ඉදිරිපත් කර තිබුණු ඒ ගනුදෙනුව නිසා ස්ලැක් සමාගමේ වටිනාකම තවත් ඉහළ ගිය බව නම් නොකියාම බැහැ. දැන් අළුතෙන්ම ලැබෙන පුවත් වලින් කියවෙන්නේ ස්ලැක් සමාගම ඩොලර් බිලියන 9 ක ලංසුවක් තබා ඇති බවයි. මේ ගැන ඇස ගසා සිටින්නේ ඇමෙරිකාවේ අන්තර්ජාල වෙළඳාමේ ප්‍රමුඛයා මෙන්ම දැවැන්ත අන්තර්ජාල තාක්ෂණික සමාගමක් වන ඇමසන් සමාගමයි.

ඇමසන් සමාගම විසින් ස්ලැක් මිලදී ගැනීම සම්බන්ධයෙන් තවමත් කිසිදු නිල ප්‍රකාශයක් සිදු කර නැහැ. එමෙන්ම දෙපාර්ශවය අතර මේ ගනුදෙනුව සම්බන්ධයෙන් තවමත් විධිමත් කථාබහක් සිදු වී ඇති බවක්ද වාර්තා වෙන්නේ නැහැ. කෙසේ වුවත් ස්ලැක් මෘදුකාංගය ඇමසන් යටතට පත් වුවහොත් එය ඇමසන් සමාගමට විශාල ප්‍රතිලාභයක් ලෙස සැලකෙනවා. එයට හේතුව වන්නේ ව්‍යාපාරික විසඳුම් සඳහා දැනටමත් නමක් දිනා සිටින ඇමසන් සමාගමට ස්ලැක් සතුව ඇති දැවැන්ත පාරිභෝගික මූලය ඉතා වැදගත් වන නිසාවෙනි...