ෆේස්බුක් කියන්නේ අපිට නැතුවම බැරි සේවාවක්. අන්තර්ජාල ප්‍රජාව අතර දිනකට එක් වරක් හෝ ෆේස්බුක් භාවිතා නොකරන අයෙක් සොයා ගන්නට අපහසුයි. සමාජ-ජාල සේවාවන් අතර ප්‍රථමයා මෙන්ම ප්‍රමුඛයා වන්නේ ද ෆේස්බුක් සේවාවයි. මේ වන විට හුදෙක්ම වෙබ් අඩවියක් හෝ සමාජ-ජාලයක් යන තැනින් ඔබ්බට ගොස්, අන්තර්ජාල සේවාවක් ලෙසින් ෆේස්බුක් ඉදිරියට පැමිණ තිබේ. ෆේස්බුක් සමාජ-ජාලය ගැන මෑතකදී අසන්නට ලැබුණු අළුත්ම පුවත් දෙකක් ඔබ වෙතට ගෙන එන්නයි මේ සූදානම...

මුලින්ම පවසන්නට යන්නේ ෆේස්බුක් හි තවත් ජයග්‍රාහි කඩඉමක් පිළීබඳවයි. ෆේස්බුක් ජාලයේ මාසික සක්‍රිය පරිශීලක ප්‍රමාණය බිලියන දෙකක සීමාවට ලඟා වූ බව අපට අසන්නට ලැබුණා. ෆේස්බුක් ප්‍රධානී මාක් ෂුකර්බර්ග් ෆේස්බුක් පණිවුඩයක් මගින් ඒ බව ලොවට ප්‍රකාශ කරන්නට යෙදුණා.

"ෆේස්බුක් හි සක්‍රීය සාමාජිකයින් ගණන බිලියන දෙකක් කරා ලඟා වූ බව නිල වශයෙන් දැනුම් දෙමි. ලෝකයම එකට සම්බන්ධ කරන්නට අපි පාර තැනුවෙමු... දැන්, අපි ලෝකය තවත් කිට්ටු කරවන්නට කටයුතු කරමින් සිටින්නෙමු... ඔබ සමගින් මේ යන මේ ගමන මට මහත් ගෞරවයකි..." යනුවෙන් මාක් ෂුකර්බර්ග් සඳහන් කර තිබිණි.

ෆේස්බුක් සේවාව 2004 වර්ශයේදී ආරම්භ වූ අතර බිලියනක සාමාජික ප්‍රමාණයට ලඟාවීමට වසර 08 ක් ගතවිය. 2012 දී බිලියනයේ සීමාව පසුකළ ඔවුන් බිලියන 1.5 සීමාව වෙත 2015 දී ලඟා වූ අතර බිලියන 2 සීමාව වෙත 2017 ජුනි මාසයේ දී ලඟාවීමට සමත් වූහ. ෆේස්බුක් සමාජ-ජාලයට අමතරව, ෆේස්බුක් ආයතනය සතු අනෙකුත් සේවාවන් වන මැසෙන්ජර් (Messenger) සේවාව හා වට්ස්ඇප් (WhatsApp) සේවාවන් ද පරිශීලයින් බිලියනක සීමාව පසු කරන්නට සමත් වී තිබේ.

---

දෙවන පුවතින් අප පවසන්නට සැරසෙන්නේ ෆේස්බුක් ආයතනය විසින් සැලසුම් කරමින් යන නවතම වැඩ පිළිවෙලක් පිළිබඳවයි. ඒ අනුව ඉදිරියේදී ෆේස්බුක් ආයතනය විසින් රූපවාහිනී කථා මාලා නිෂ්පාදනය සඳහා සිත යොමුකර ඇති බව අසන්නට ලැබෙනවා. හොලිවුඩ් හි ප්‍රධාන පෙළේ චිත්‍රාගාර, නිෂ්පාදන ආයතන සහ නියෝජිත ආයතන සමගින් මේ පිළිබඳව අවශ්‍ය වන නිළ සාකච්ඡා මේ වන විටත් පවත්වා අවසන් අතර එහිදී ධනාත්මක ප්‍රතිචාර ලැබී ඇති බවයි සඳහන් වන්නේ. ඒ අනුව Netflix හා Hulu වැනි ස්ට්‍රීමින් (Streaming) සේවාවන් මෙන් ඉදිරියේදී ෆේස්බුක් ඔස්සේද ටීවී සීරීස් හෙවත් ටෙලි කථා මාලා නැරඹීමට හැකිවනු ඇත.

එක් කථාංගයක් සඳහා ෆේස්බුක් ආයතනය විසින් ඩොලර් මිලියන 03 ක් වැනි ඉහළ මුදලක් ගෙවීමට එකඟ වී තිබේ. අවුරුදු 13 ත් 34 ත් අතර ප්‍රේක්ෂක පිරිස ෆේස්බුක් ආයතනයේ ඉලක්කය වී තිබේ. විශේෂයෙන්ම 17-30 වයස් කාණ්ඩය කෙරෙහි ඔවුන්ගේ සුවිශේෂී අවධානයක් යොමු කර තිබේ. පවුලේ සැමට එකට සිට නැරඹිය හැකි අන්තර්ගතයන් ෆේස්බුක් ස්ට්‍රීමින් සේවාව මගින් ලබාදෙනු ඇති අතර ඒවා දේශපාලනික හෝ ප්‍රවෘත්තිමය අගයයන්ගෙන් තොර, එමෙන්ම නිරුවත් දර්ශණ හෝ අසභ්‍ය වදන් වලින් තොර වූ ඒවා වනු ඇතැයි බලාපොරොත්තු පළවේ.

දැනටමත් ටෙලි කථාංග දෙකක් ෆේස්බුක් ස්ට්‍රීමින් සේවාව වෙත එක්කර තිබේ. ස්ට්‍රේන්ජර්ස් (Strangers) හා ලාස්ට් ස්ටේට් ස්ටෑන්ඩින් (Last State Standing) යන කථා මාලා දෙකයි. මේ වසර අවසානයට පෙර ෆේස්බුක්  ඔස්සේ ටීවී සීරීස් නැරඹීමටත් අවස්ථාවක් ලැබෙනු ඇතැයි බලාපොරොත්තු තබා ගත හැකි බව පෙනේ.

 

ගූගල් සමාගමේ ජනප්‍රියතම දුරකථන නිෂ්පාදනයක් වන ගූගල් පික්සල් (Google Pixel) උපාංගයේ දෙවැනි සංස්කරණය වශයෙන් Google Pixel 2 මේ වසර අවසාන භාගයේදී නිකුත් කිරීමට නියමිතව ඇත. ගූගල් සමාගම විසින් මේ සම්බන්ධයෙන් විශේෂයෙන් සඳහන් කර නැතත්, අන්තර්ජාලයේ පළවී ඇති යම් යම් තොරතුරු අනුව Google Pixel 2 සම්බන්ධ ඉඟි කීපයක් දැන ගන්නට ලැබී තිබේ. මේ අනුව HTC සමාගම විසින් Pixel 2 හා Pixel XL 2 උපාංගයන් නිෂ්පාදනය කරනු ඇත. පසුගිය වසරේ එළි දැක්වුනු පෙරළිකාර Pixel උපාංගයන් ද නිෂ්පාදනය කරන ලද්දේ HTC සමාගම විසිනි.

අන්තර්ජාල තොරතුරු හා නිෂ්පාදන සමාගම් වල අභ්‍යන්තර තොරතුරු ඔස්සේ ඔත්තු සොයා යන ඉඟි සපයන්නන් විසින් අදාල දත්ත ගබඩා වල ඇති S2 හා M2 යන නමින් හඳුන්වන උපාංග දෙකකට අදාල දත්ත සොයාගෙන ඇත. මේවා Pixel 2 හා Pixel XL 2 උපාංගයන් සඳහා අදාල කේත නාම ලෙස සැක කර ඇත. පෙර නිකුත් වූ Pixel පළමු සංස්කරණය සඳහා මේ කේත නාම දැක්වුනේ S1 හා M1 ලෙසින් වන බැවින් මේ උපකල්පනය සාධාරණ බව පෙනී යයි.

අළුත් පික්සල් උපාංගයන් සඳහා Qualcomm Snapdragon 835 චිප් එක යොදා ගනු ඇති බව සඳහන් වේ. මේ ආරංචි මාර්ග වලට අනුව Pixel XL 2 උපාංගයේ අඟල් 5.6 ක තිරයක් ඇති බව පෙනී යයි. එහි තිර විභේදනය පික්සල් 2560x1312 කි. එසේම Pixel XL 2 උපාංගයේ 4GB Ram මතකයක් අඩංගු වනු ඇතැයි පැවසේ.

තවත් ආරංචි මාර්ගයකින් පැවසුනේ ගූගල් සමාගම විසින් මෙවර වෙනස් මාදිලි වලින් පික්සල් උපාංග තුනක් නිකුත් කරන්නට සැලසුම් කර ඇති බවයි. එහිදී උපාංග දෙකක් HTC සමාගම විසින් ද, අනෙක LG සමාගම විසින් ද නිපදවනු ඇතැයි පැවසේ. කෙසේ වෙතත් මෙහි සත්‍ය අසත්‍යභාවය ගැන නම් සහතික විය නොහැකියි. ගූගල් සමාගමේ ප්‍රකාශකයෙක් මාර්තු මාසයේ දී පවසා සිටියේ 2017 වසර අවසාන භාගයේ දී නවතම ඇන්ඩ්‍රොයිඩ් සංස්කරණය වන Android O සමගින් පික්සල් උපාංගයන් හි නව සංස්කරණයන් ද නිකුත් කරන්නට අදහස් කරන බවයි...

මාස ගණනාවක් තිස්සේ තිබුණු අර්බුධකාරී තත්ත්වය අවසන් කරමින්, අවසානයේදී ඌබර් (Uber) සමාගමේ ප්‍රධාන විධායක නිළධාරියා වන ට්‍රැවිස් කැලැනිච් එම තනතුරෙන් ඉල්ලා අස් වී ඇති බව වාර්තා වේ. ඌබර් ටැක්සි සේවාව මොබයිල් පාදක කරගත් ලොව ප්‍රමුඛතම කුලී රථ සේවාවයි.  වර්තමාන ලෝකයේ ප්‍රමුඛතම තාක්ෂණික සේවා සමාගමක් ලෙස පෙරට පැමිණි Uber සමාගමේ මේ අර්බුධය එහි අනාගතයට අහිතකර ලෙස බලපානු ඇති දැයි විචාරකයින් සැක පළ කරයි.

ට්‍රැවිස් කැලැනිච් හා  Uber සමාගමේ නිළධාරින් අතර කලක පටන්ම මත ගැටුම් පැවතිණි. ඔහු පසුගිය සතියේ සිට නිවාඩු ලබා සිටියේ සිය මව හදිසියේම බෝට්ටු අනතුරකින් ජීවිතක්ෂයට පත්වීම නිසායි. Uber හවුල්කාර කොටස් හිමියන් ට්‍රැවිස් ගේ පාලනය පිළිබඳ නොසතුටින් සිටි අතර ඔහුට ප්‍රධාන විධායක නිළධාරි ධූරයෙන් ඉවත් වීමට බලපෑම් කළ නමුත් ට්‍රැවිස් ඒ සඳහා දැක්වූයේ සතුටුදායක ප්‍රතිචාරයක් නොවේ. කෙසේ වෙතත් අවසානයේදී අධ්‍යක්ෂක මණ්ඩලයේ කැමැත්තට ඉඩ දී ඔහු ඉල්ලා අස්වීමට තීරණය කර ඇත. ඔහු අධ්‍යක්ෂක මණ්ඩල සාමාජිකයෙක් ලෙස තව දුරටත් රැඳී සිටින බව Uber සමාගම විසින් ප්‍රකාශ කර තිබේ.

"මගේ ජීවිතයේ අන් කිසිදු දෙයකට වඩා මම Uber සමාගමට ආදරෙයි... මම දැන් පසුවන අසීරු අවස්ථාවේ දී වුවත් ආයෝජකයින්ගේ ඉල්ලීම පරිදි මම තනතුරින් ඉල්ලා අස්වන්නේ සමාගමේ අනාගතය සලකා බලමින්... අරගල මැද සිටිනවාට වඩා මෙම තීරණය සමාගම පැත්තෙන් යහපත් එකක් වේවි... " යැයි ට්‍රැවිස් කැලැනිච් පවසා තිබිණි.

Uber සමාගම මේ පසුගිය වසර 08 ක පමණ කාලය තුල දී දැවැන්ත සමාගමක් ලෙසින් ඉදිරියට පැමිණි අතර එහි වෙළඳපොල වටිනාකම ඩොලර් බිලියන 14 කට අධික වේ. ප්‍රවාහන ක්ෂේත්‍රයේ තවත් දැවැන්ත නවීකරණයන් සඳහා ඔවුන් මේ වන විටත් සැලසුම් කරමින් සිටී. ඒ අතරින් ස්වයංක්‍රීයව ධාවනය වන කාර් රථ ටැක්සි සේවාවන් ආරම්භ කිරීමේ පර්යේෂණ මේ වන විටත් සිදු වෙමින් පවතී...

අපේ එදිනෙදා ජීවිතයේ සෑම සියලු දෙයකටම අපට සහය වන ගූගල් සෙවුම් යන්ත්‍රය දැන් තවත් අලුත් සේවාවක් හඳුන්වා දී තිබේ. ඒ රැකියාවක් සොයන අයට වඩාත් පහසුවෙන් තමන්ට අවශ්‍ය රැකියාව සොයා ගැනීමට Google for Jobs නම් සේවාව දියත් කිරීමයි.

මෙය ගූගල් හි වැඩිදියුණු කරන ලද සෙවුම් ප්‍රතිඵල සේවාවකි. එමෙන්ම මේ සඳහා ස්වයංක්‍රීය කෘතිම බුද්ධි වැඩසටහන් උපයෝගී කර ගෙන තිබේ.  Google's Cloud Jobs API නම් තාක්ෂණයද මේ සඳහා යොදාගෙන තිබේ. රැකියා බලාපොරොත්තු වන අය සහ සේවායෝජකයන් අතර වඩාත් හොඳ සම්බන්ධතාවයක් මෙමගින් ගොඩ නැගෙනු ඇතැයි ගූගල් සමාගම බලාපොරොත්තු වෙයි.

රැකියා සඳහා සෙවුම් කිරීමේ මේ සේවාව දැන් ඉංග්‍රීසි භාෂාවෙන් පමණක් ඩෙස්ක්ටොප් හා මොබයිල් උපාංග සඳහා ලබාගත හැකියි. "jobs near me" හෝ "teaching jobs" වැනි සෙවුම් වදනක් භාවිතා කරමින් ඔබට රැකියා සඳහා සෙවුම් කළ හැකියි. Google for Jobs සේවාව මගින් ඔබට වඩාත් ගැඹුරු ලෙස හා ඔබට අවශ්‍ය ලෙසට සැකසුම් කරමින් රැකියා සෙවිය හැකිවීම විශේෂ පහසුවකි.

රැකියා අවස්ථා ලබාදීම සඳහා ගූගල් සමාගම විවිධ සමාගම් රැසක් සමගින් සම්බන්ධ වී ඇත. LinkedIn, Monster, WayUp, DirectEmployers, CareerBuilder, Glassdoor, Facebook යනු එයින් සමාගම් කීපයක් පමණි. ඉදිරියේදී මේ සේවාව තවත් පුළුල් කිරීමටත්, තවත් පහසු කිරීමටත් ගූගල් සමාගම බලාපොරොත්තු වේ.

Google for Jobs පිළිබඳව පහත වීඩියෝවෙන් තවත් විස්තර දැකගත හැකිවනු ඇත...

මයික්‍රොසොෆ්ට් සමාගම යනු මෘදුකාංග නිර්මාණ ආයතනයක් පමණක්ම නොවේ. ඔවුන් විසින් කලින් කලට අපූරු තාක්ෂණික උපාංගයන් ද නිෂ්පාදනය කරනු ලබයි. ඒවායින් සුප්‍රසිද්ධම උපාංගය වන්නේ Xbox වීඩියෝ කන්සෝලයයි. පසුගියදා ඔවුන් සිය නවතම නිර්මාණය වෙළඳපොලට හඳුන්වා දෙනු ලැබුවා. එය මොඩර්න් කීබෝඩ් (Modern Keyboard) ලෙසින් හඳුන්වා දී ඇති අතර මෙහි ඇති විශේෂත්වය වන්නේ මෙම නවතම යතුරු පුවරුවට ඇඟිලි සළකුණු හඳුනාගත හැකි Fingerprint Sensor එකක් ඇතුළත් කර තිබීමයි.

මෙම ඇඟිලි සළකුණු සංවේදකය බැලු බැල්මට නොපෙන්නේ එය තවත් එක් key එකක් ආකාරයෙන් නිර්මාණය කර තිබීම නිසායි. Alt, Ctrl, Shift යතුරු තුනට මැදිවන ලෙස, තවත් එක් අතිරේක key එකක් ලෙසින් මෙම Fingerprint Sensor එක ස්ථානගත කර තිබේ. යතුරු පුවරුවේ අනෙකුත් ඕනෑම යතුරක් ඔබන ආකාරයෙන් මෙයද ඔබට press කළ හැකියි. එවිට ඔබ රහස් පද (Password) ඇතුලත් කරන ඕනෑම තැනකදී මෙම තනි key එක එබීම පමණක් සෑහේ. මේ නිසා රහස් පද මතක තබා ගැනීම හා ඒවා එකින් එක ටයිප් කිරීම යන කරදරයෙන් මිදී ක්ෂණිකව හා ආරක්ෂාකාරීව පරිගණක දත්ත අගුලු දැමීමට හා ඇරීමට ඔබට හැකියාව ලැබේ.

Modern Keyboard එක හැඩයෙන් ඉතා සිහින් වුවත්, ශක්තිමත් ආකාරයෙන් නිමවා ඇති බව පෙනේ. මෙය අවශ්‍ය නම් USB කේබලයක් මගින් පරිගණකය හා සම්බන්ධ කළ හැකි නමුත්, බ්ලූටූත් ආකාරයට (Bluetooth LE) රැහැන් රහිතව හා දුරස්ථව භාවිතා කළ හැකිවීම විශේෂත්වයකි. මේ ආකාරයෙන් රැහැන් රහිතව වැඩ කිරීමේදී Modern Keyboard හි බැටරිය මාස 04 ක් පමණ කාලයක් භාවිතා කළ හැකි බව මයික්‍රොසොෆ්ට් සමාගම පවසා සිටී. මෙය රැහැන් රහිතව අඩි 17 ක (5 m) දුරක් සඳහා සහාය දක්වයි. මෙවැනි විශේෂාංග වලින් යුතු වුවත්, Modern Keyboard එකෙහි ඇති එක් අවාසියක් වන්නේ මෙය දැනට සහාය දක්වන්නේ වින්ඩෝස් 10 සඳහා පමණක් වීමයි. Mac, iOS හා Android පරිශීලයන් මෙන්ම පැරණි වින්ඩෝස් සංස්කරණ භාවිතා කරන පරිශීලකයන්ට Modern Keyboard එක අත් විඳින්නට ඇති අවස්ථාව මේ නිසා අහිමි වී යයි.


මයික්‍රොසොෆ්ට් සමාගම විසින් තවමත් මෙය නිකුත් කරන දිනය ගැන සඳහන් කර නොමැත. කෙසේ වුවත් මෙහි මිළ ඇමෙරිකාන් ඩොලර් 129.99 ක් (ආසන්න වශයෙන් රුපියල් 20,000/- ක් !!!) ලෙසින් දක්වා තිබේ. Modern Keyboard පිළිබඳ විස්තර ඔබට පහත වීඩියෝවෙන් නැරඹිය හැකියි...

ස්ලැක් යනු ව්‍යාපාරික ලෝකයේ ජනප්‍රිය පණිවුඩ හුවමාරු කරගන්නා මෘදුකාංගයකි. බොහෝ ව්‍යාපාර ආයතනයන් ස්ලැක් භාවිතා කර සිය දෛනික කාර්යාලීය තොරතුරු හුවමාරු කර ගන්නා අතර එය කාර්යාලීය කාර්යක්ෂමතාවයට ද හේතු වී තිබේ. ස්ලැක් මෘදුකාංගය කුඩා මෘදුකාංග සමාගමක් වන අතර එය මේ වන විට අත් කරගෙන ඇති ජනප්‍රියභාවය හා ව්‍යාපාර ලෝකයේ අත්කර ගෙන ඇති බලපෑම නිසා මෘදුකාංග ලෝකයේ දැවැන්ත සමාගම් කීපයක්ම දැන් ස්ලැක් කෙරෙහි ඇස ගසා ගෙන සිටින බව නොරහසක්.

මේ වන විට ස්ලැක් හි වෙළඳපොළ වටිනාකම ඇමෙරිකානු ඩොලර් බිලියන 3.8 ක් පමණ වේ. පසුගිය වසරේ මයික්‍රොසොෆ්ට් සමාගම ස්ලැක් මිලදී ගන්නට ඉතා ආසන්නම සිටි නමුත් ඒ ගනුදෙනුව සිදු නොවීය. කෙසේ වෙතත් ඩොලර් බිලියන 8 ක් ලෙස ඉදිරිපත් කර තිබුණු ඒ ගනුදෙනුව නිසා ස්ලැක් සමාගමේ වටිනාකම තවත් ඉහළ ගිය බව නම් නොකියාම බැහැ. දැන් අළුතෙන්ම ලැබෙන පුවත් වලින් කියවෙන්නේ ස්ලැක් සමාගම ඩොලර් බිලියන 9 ක ලංසුවක් තබා ඇති බවයි. මේ ගැන ඇස ගසා සිටින්නේ ඇමෙරිකාවේ අන්තර්ජාල වෙළඳාමේ ප්‍රමුඛයා මෙන්ම දැවැන්ත අන්තර්ජාල තාක්ෂණික සමාගමක් වන ඇමසන් සමාගමයි.

ඇමසන් සමාගම විසින් ස්ලැක් මිලදී ගැනීම සම්බන්ධයෙන් තවමත් කිසිදු නිල ප්‍රකාශයක් සිදු කර නැහැ. එමෙන්ම දෙපාර්ශවය අතර මේ ගනුදෙනුව සම්බන්ධයෙන් තවමත් විධිමත් කථාබහක් සිදු වී ඇති බවක්ද වාර්තා වෙන්නේ නැහැ. කෙසේ වුවත් ස්ලැක් මෘදුකාංගය ඇමසන් යටතට පත් වුවහොත් එය ඇමසන් සමාගමට විශාල ප්‍රතිලාභයක් ලෙස සැලකෙනවා. එයට හේතුව වන්නේ ව්‍යාපාරික විසඳුම් සඳහා දැනටමත් නමක් දිනා සිටින ඇමසන් සමාගමට ස්ලැක් සතුව ඇති දැවැන්ත පාරිභෝගික මූලය ඉතා වැදගත් වන නිසාවෙනි...

සැම්සුන් සමාගමේ සුපිරිම ජංගම දුරකථන නිෂ්පාදනය වන්නේ ගැලැක්සි ස්මාට් දුරකථනය හා ගැලැක්සි නෝට් යන ෆැබ්ලට් වර්ගයේ ජංගම දුරකථන උපාංගයයි. නවතම සංස්කරණයක් ලෙසින් Galaxy S8 ස්මාට් දුරකථනය පසුගිය අප්‍රේල් මස එළි දැක්වුනු අතර ගැලැක්සි නෝට් හි නවතම සංස්කරණය Galaxy Note 8 ලෙසින් ලබන අගෝස්තු-සැප්තැම්බර් කාලයේදී එළි දැක්වෙනු ඇති. මෙම අලුත්ම Galaxy Note 8 උපාංගයේ ඇතැයි සලකන විශේෂාංගයන් ගැන අන්තර්ජාලයේ විවිධ මත පළවන අතර, ඉතා විශ්වාසදායක ආරංචි මාර්ග කීපයකින් අපට දැනගන්නට ලැබුණු කරුණු කීපයක් මෙහි පළ වේ.

කේත නාමය SM-N950F ලෙසින් හැඳින්වෙන Galaxy Note 8 උපාංගයේ මෙහෙයුම් පද්ධතිය Android 7.1.1 ලෙස සඳහන් වී තිබුණු බව HTML5Test වෙබ් අඩවියේ දැක්වේ. කෙසේ වුවත් හඳුන්වාදීමට නියමිත නවතම ඇන්ඩ්‍රොයිඩ් මෙහෙයුම් පද්ධතිය වන Android O පද්ධතිය සමගින් Galaxy Note 8 උපාංගය එළි දැක්වීමට ද ඉඩ ඇත. කෙසේ වුවත් Galaxy Note 8 සඳහා දැනටමත් ස්ථාවර මෙහෙයුම් පද්ධති සංස්කරණයක් ලෙසින් සැලකෙන Android 7.1.1 නෝගට් භාවිතා කරනු ඇති අතර Android O (8.0) සඳහා පසුව යාවත්කාලීනයන් ලබාදෙනු ඇති බවට සැලකිය හැකියි.

HTML5Test වෙබ් අඩවියේ වෙබ් බ්‍රවුසර හැකියාව මනිනු ලබන ලකුණු ක්‍රමවේදයට අනුව, ඇපල් iPhone 7 Plus ස්මාට් දුරකථනය ලකුණු 415 ක් ලබා ඇති අතර Galaxy Note 8 උපාංගය 555 න් 488 ක් ලබා තිබේ.

තවත් ආරංචි මාර්ගයක් සඳහන් කර ඇත්තේ Galaxy Note 8 හි සංස්කරණ දෙකක් වෙළඳපොලට නිකුත් කරනු ඇති බවයි. එක් වර්ගයක් සඳහා 6GB RAM මතකයක් අඩංගු අතර එය ඇමෙරිකානු වෙළඳපොල ඉලක්ක කොට නිකුත් කෙරේ. අනෙක් ආකාරය සඳහා 8GB RAM මතකයක් ඇති අතර එය චීන වෙළඳපොලට නිකුත් කෙරෙනු ඇත. මීට පෙර නිකුත් වූ Galaxy S8 ස්මාට් දුරකථනය ද  4GB RAM අගයක් සහිතව නිකුත් කළ නමුත්, චීන වෙළඳපොල සඳහා  6GB RAM අගයක් සහිත සංස්කරණයක් නිකුත් කළ නිසා ඉහත අදහස පිළිගත හැකි බව පෙනේ.

Galaxy Note 8 උපාංගයේ දෘඪාංග හැකියාවන් බැලීමේදී Qualcomm Snapdragon 836 නම් නවතම ප්‍රොසෙසරය භාවිතා වනු ඇත. මේ ප්‍රොසෙසරය 8 Core වන අතර වේගය 2.6GHz තරම් ඉහළ අගයක් ගනු ඇති. GPU clock අගය 740MHz ලෙස සඳහන් වේ. මෙහි තිරය අඟල් 6.3 ක් වනු ඇති අතර එය Super AMOLED Infinity Display එකක් ලෙස සැලකේ. එමෙන්ම ඇඟිලි සලකුණු හඳුනා ගත හැකි fingerprint sensor එකක් ද මෙම තිරයට අඩංගු කර ඇත.

අභ්‍යන්තර මතකය ගැන සැලකීමේදී 128GB හා 256GB ලෙසින් අගයන් දෙකකින් යුතුව නිකුත් කිරීමට ඉඩක් ඇත. එමෙන්ම microSD මතකපත් සඳහා ද සහාය දක්වනු ඇත. S-Pen නම් වූ තිරය මත ඇඳීමට හා ලිවීමට භාවිතා කරන පන්හිඳ Galaxy Note හි සුවිශේෂීතාවයයි. ඒ සුවිශේෂීතාවය තවත් ඉදිරියට ගෙන යමින්, Galaxy Note 8 සඳහා ද්විත්ව පසුපස කැමරා (dual rear cameras) අන්තර්ගත කෙරෙනු ඇති බවටද මත පළ වී තිබේ.

ඉහත පළ වී ඇති කාරණා කිසිවක් සැම්සුන් සමාගමෙන් නිළ වශයෙන් ප්‍රකාශ කළ කාරණා නොවේ. ඒ නිසා සැබෑ නිෂ්පාදනය එළි දැක්වීමේදී මේ විශේෂාංග වෙනස් විය හැකියි. කෙසේ වුවත් සැම්සුන් සමාගමේ නවතම
Galaxy Note 8 උපාංගයේ හැකියාවන් හඳුනා ගැනීමට මෙය මනා පිටුවහලක් වනු ඇතැයි යන්න අපේ බලාපොරොත්තුවයි...

   

SpaceX (ස්පේස් එක්ස්) ආයතනය යනු ඇමෙරිකාවේ ප්‍රමුඛතම පෞද්ගලික අභ්‍යවකාශ ආයතනයි. ඔවුන්ගේ ෆෝල්කන් රොකට් පද්ධතිය සහ ඩ්‍රැගන් කැප්සියුලය 2012 වසරේ සිටම අන්තර්ජාතික අභ්‍යවකාශ මධ්‍යස්ථානයට භාණ්ඩ ප්‍රවාහනය කිරීමේ සැපයුම් මෙහෙයුම් සිදු කරයි. පසුගිය මස අවසාන භාගයේ තවත් එවැනි භාණ්ඩ සැපයුම් මෙහෙයුමක් SpaceX සමාගම විසින් දියත් කරන ලද අතර, මෙය SpaceX ආයතනය නාසා ආයතනය හා එක්ව සිදුකරන ලද 11 වැනි සැපයුම් මෙහෙයුම ලෙස සඳහන් වේ.

SpaceX සමාගමට මේ නවතම මෙහෙයුම විශේෂ වැදගත් භාවයක් උසුලයි. එයට හේතුව වන්නේ මෙවර සැපයුම් රැගෙන යාම සඳහා යොදාගත්තේ මීට පෙරත් 2014 සැප්තැම්බර් මාසයේදී මෙවැනිම මෙහෙයුමකට යොදා ගෙන, පසුව නැවතත් අළුත්වැඩියා කොට නවීකරණය කරන ලද ඩ්‍රැගන් කැප්සියුලයක් වීමයි.

ඩ්‍රැගන් කැප්සියුලය සාර්ථකව අන්තර්ජාතික අභ්‍යවකාශ මධ්‍යස්ථානය කරා ලඟා වූ බව නාසා ආයතනය ප්‍රකාශ කර ඇත. අන්තර්ජාතික අභ්‍යවකාශ මධ්‍යස්ථානයේ, පෘථිවිය දෙසට මුහුණ ලා ඇති Harmony (හාමනි) නම් මොඩියුලය වෙත ඩ්‍රැගන් කැප්සියුලය ඈඳන ලද්දේ එහි ඇති රොබෝ යාන්ත්‍රික අත උපයෝගී කර ගනිමිනි. මෙම සැපයුම් මෙහෙයුම සඳහා ඩ්‍රැගන් කැප්සියුලය මගින් කිලෝග්‍රෑම් 2721 ක භාණ්ඩ අභ්‍යවකාශ මධ්‍යස්ථානය වෙත රැගෙන ගොස් තිබේ.

මාසයක පමණ කාලයක් ඩ්‍රැගන් කැප්සියුලය අභ්‍යවකාශ මධ්‍යස්ථානය හා සම්බන්ධ කොට තැබේ. පසුව මධ්‍යස්ථානයෙන් ඉවත ලන සහ අවශ්‍ය නැති උපාංග රැගෙන මෙම කැප්සියුලය නැවත පෘථිවිය වෙත පැසිෆික් සාගරය වෙත පතිත වීමට නියමිතයි.

වරක් භාවිතා කරන ලද කැප්සියුලයක් නැවත නැවත වරක් අභ්‍යවකාශ මෙහෙයුම් සඳහා භාවිතා වූයේ පළමු වරට වීම මෙහි ඇති සුවිශේෂී භාවයයි. SpaceX සමාගම ඔවුන්ගේ රොකට් පද්ධතිය ද වරක් භාවිතා කළ පසු නැවත භාවිතා කළ හැකි ආකාරයට නිර්මාණය කර සාර්ථකව අත්හදා බලා ඇති අතර මෙ වනවිටත් එම ක්‍රමය සාර්ථකව යොදා ගනී. එමගින් වරක් භාවිතා කරන ලද රොකට් එන්ජින් නැවත් නැවතත් මෙහෙයුම් සඳහා යොදා ගනිමින් පිරිවැය අඩු කර ගැනීමට ඔවුන්ට හැකි වී ඇත. දැන් මේ නවතම සැපයුම් මෙහෙයුම සමගින් ඩ්‍රැගන් කැප්සියුලය ද නැවත නැවතත් භාවිතා කළ හැකි බව ඔප්පු වී තිබේ.

SpaceX සමාගමේ නිර්මාතෘ මෙන්ම ප්‍රධානියා ද වන එලෝන් මස්ක් ප්‍රකාශ කර සිටියේ, අභ්‍යවකාශ ක්ෂේත්‍රයේ දී ද, නැවත් නැවතත් එකම උපාංගය භාවිතා කිරීම සාමාන්‍යකරණය කරන්නට හැකි වීම සමාගමක් ලෙස ඔවුන් ලැබූ සුවිශේෂී ජයග්‍රහණයක් බවයි...

වේගවත් අන්තර්ජාල අත්දැකීමක් ලබාදීම සඳහා දැන් ෆයර්ෆොක්ස් වෙබ් බ්‍රවුසරයේ නවතම සංස්කරණය නිකුත් වී තිබේ. මොසිල්ලා සමාගම පවසන්නේ නවතම Firefox 54 සංස්කරණය ක්‍රෝම් බ්‍රවුසරයට වඩා වේගවත් වන බවයි. මෙහි ඇති ප්‍රධානම වැඩිදියුණු කිරීම ලෙස දක්වන්නේ අඩු RAM මතක ප්‍රමාණයක් භාවිතා කිරීම හා ටැබ් අතර මාරු වීමේදී සුමටව ක්‍රියා කිරීමේ හැකියාවයි.

multiprocess හෙවත් එකවර ටැබ් කීපයක් නිසි ලෙස කළමණාකරණය කරගැනීමේ තාක්ෂණය වැඩි දියුණු කිරීමේන් Firefox 54 වේගවත් කර තිබේ. පරිගණක පද්ධතිය සතු RAM හා Processor ඇතුළු පරිගණක සම්පත් නිසි ලෙස හැසිරවීමට මෙම නව ෆයර්ෆොක්ස් සංස්කරණය සමත් වේ. මෙමගින් එක් ටැබ් එකක් අක්‍රිය වුවත්, අනෙක් ටැබ් වලට බලපෑමක් ඇති නොවේ. ඔබ එක් ටැබ් එකක  Facebook වැනි තරමක් විශාල වෙබ් පිටුවක් ප්‍රවේශ කර ඇත්නම්, බොහෝ විට අනෙකුත් ටැබ් වලට ද එය අහිතකර ලෙසින් බලපෑම් කරයි. නමුත් Firefox 54 හිදී එක් ටැබ් එකක බරපතල වෙබ් පිටුවක් තිබුනත් එය අනෙකුත් ටැබ් වලට බලපෑමක් නොකරයි. වේගවත් ලෙසින් ධාවනය වීම හා අතරමග දී හදිසියේ crash වීම් අවම කර තිබීම හැරුණු කොට, වෙබ් පිටු සුමටව හැසිරවීමට ද නව ෆයර්ෆොක්ස් සංස්කරණය සමත්ය. මේ නිසා ෆේස්බුක් Newsfeed වැනි වෙබ් අඩවි වලදී පවා බ්‍රවුසරය මනා ලෙසින් පාලනය කළ හැකියි.

ගූගල් ක්‍රෝම් වෙබ් බ්‍රවුසරය පහසුකම් අතින් හා වේගය අතින් හොඳ වුවත්, එය අති දැවැන්ත ලෙසින් RAM මතකය කා දමන බව ඔබ හොඳින් දන්නවා ඇති. එයට ප්‍රධානතම හේතුව වන්නේ ක්‍රෝම් හි එක් ටැබ් එකක් එක් processes එකක් ලෙසින් හැසිරීමයි. මෙහිදී ටැබ් ගණන වැඩි වන විට processes ගණනද වැඩි වේ. එක්
processes එකකට 100MB පමණ මතකයක් වැය වේ. නමුත් Firefox 54 සංස්කරණයේදී සියළුම ටැබ් සඳහා ලබදෙන්නේ processes 04 ක් පමණි. මේ නිසා වැඩි RAM ප්‍රමාණයක් වැය වීම නතර කර තිබේ. මොසිල්ලා සමාගම දක්වා ඇති පරිදි ෆයර්ෆොක්ස් නවතම සංස්කරණය වින්ඩෝස් 10 පරිගණකය දී  භාවිතා කරන්නේ Chrome බ්‍රවුසරය භාවිතා කරන RAM ප්‍රමාණය මෙන් භාගයක් පමණි.

ඔබත් ගූගල් ක්‍රෝම් භාවිතා කරන අයෙක් ද ? එසේ නම් පරිගණකය මන්දගාමී වීම හා පරිගණක මතකය කා දැමීම යන කාරණා නිසා ක්‍රෝම් එපා වෙලා ද ? වෙනසකටත් එක්ක ෆයර්ෆොක්ස් අළුත් එකට මාරුවෙලා බලමු ද ?

වීඩියෝ ක්‍රීඩා ගැන කථා කරද්දී, ගේම් කොන්සෝල් වලට හිමි වෙන්නේ ප්‍රධාන තැනක්. වීඩියෝ ක්‍රීඩාවක යෙදෙද්දී එහි උපරිම අත්දැකීම ලබා ගන්න නම් ගේම් කොන්සෝල් එකකින්ම ගේම් ගහන්න ඕනේ. දැනට එළි දක්වලා තියෙන හොඳම ගේම් කොන්සෝල් දෙක වෙන්නේ මයික්‍රොසොෆ්ට් සමාගමේ Xbox හා සෝනි සමාගමේ Play Station යන කොන්සෝල් දෙකයි. මේ ගේම් කොන්සෝල් දෙකේම නවතම සංස්කරණයන් පසුගිය මාස කිහිපයක කාලයේ දී එළි දැක්වුනා.

මයික්‍රොසොෆ්ට් සමාගම ඔවුන්ගේ නවතම ගේම් කොන්සෝලය වන Xbox One X උපාංගය පසුගිය සතියේ වෙළඳ පොලට නිකුත් කලා. ඒ සමගින් පසුගිය වසරේ එළි දැක්වුනු සෝනි සමාගමේ PlayStation 4 Pro උපාංගයට ගැලපෙන කදිම තරඟකරුවෙක් කරළියට පැමිණි බව තමා වෙළඳ පොල විචාරකයින් පවසා සිටියේ.

මේ ගේම් කොන්සෝල දෙකම 4K විභේදනයේ වීඩියෝ සඳහා සහාය දක්වනවා. එම නිසා වීඩියෝ ක්‍රීඩා තුල දී  ඉතාමත් උසස් තත්ත්වයේ රූප රාමු මෙම කන්සෝල් දෙකෙන්ම ලබා දෙනවා. කෙසේ වෙතත් මයික්‍රොසොෆ්ට් සමාගම පවසා සිටින්නේ සෝනි සමාගමේ PS4 Pro උපාංගය නියම 4K උපාංගයක් නොවන බවයි. ඔවුන් පවසන පරිදි 4K සඳහා සහය දක්වන එකම ගේම් කොන්සෝලය වන්නේ පසුගියදා නිකුත් කරන ලද Xbox One X උපාංගයයි.

හොඳම ගේම් කොන්සෝලය වීම සඳහා මේ සමාගම් දෙක අතර පවතින තරඟය පසෙක තබා, මේ නවතම කොන්සෝල් දෙකෙහි දෘඩාංග හැකියාවන් පිළිබඳ විමසා බැලුවොත් සැබෑ වැඩකාරයා කවුරුන් දැයි අපිට වටහා ගත හැකි වනු ඇති.

Xbox One X කොන්සෝලය මිල කර ඇත්තේ ඇ.ඩො. $499 කටයි. නමුත් PS4 Pro කොන්සෝලය ඇ.ඩො. $399 කට ලබා ගන්නට පුලුවන්. ඒ අනුව බැලීමේදී මිල වාසිය ඇත්තේ  PS4 Pro වෙතයි. කෙසේ වුවත් මයික්‍රොසොෆ්ට් සමාගම පවසා සිටින්නේ Xbox One X කොන්සෝලය සතු හැකියාවන්  PS4 Pro සමගින් සැසඳිය නොහැකි නිසා මේ මිල වාසිය අදාල කාරණයක් නොවන බවයි.

මේ කොන්සෝල් දෙකෙහි ප්‍රොසෙසර හැකියාවන් පිළිබඳව බැලීමේදී දෙකෙහිම ඇත්තේ සමාන හැකියාවන් බව කිව හැකියි. Xbox One X හි ඇත්තේ 2.3 GHz 8-core x86 වර්ගයේ ප්‍රොසෙසරයකි. PS4 Pro කොන්සෝලයේ ඇත්තේ  2.1GHz 8-core x86 ප්‍රොසෙසරයකි. ඒ අනුව කොන්සෝල දෙකෙහිම ප්‍රොසෙසර හැකියාවන් සමාන බව පෙනීයයි.

කෙසේ වුවත් GPU හෙවත් ග්‍රැෆික් හැකියාවන් සැලකීමේදී Xbox One X ඉදිරියෙන් සිටී.

• Xbox One X: 40 compute units @ 1.172GHz, 12GB GDDR5, 326GB/sec bandwidth, 6 TFLOPS compute power

• PS4 Pro: 36 GCN compute units @ 911MHz, 8GB GDDR5, 218GB/sec bandwidth, 4.3 TFLOPS compute power

කෙසේ වෙතත් දෘඩාංග හෙවත් හාර්ඩ්වෙයාර් යනු වීඩියෝ ක්‍රීඩා කොන්සෝලයක් සතු හැකියාව පෙන්වන එක් තලයක් පමණයි. ක්‍රීඩා කළ හැකි සුපිරි වීඩියෝ ක්‍රීඩා නැත්නම් කොපමණ හොඳ කොන්සෝලයකින් වුවත් ප්‍රයෝජනයක් නැහැ.  පසුගියදා නිකුත් වූ Xbox One X සඳහා 4K ප්‍රමිතියට අනුකූලව නිපදවන ලද නමගිය සුපිරි පරිගණක ක්‍රීඩා 30 කට අධික ප්‍රමාණයක් දැනටමත් නිකුත් කර ඇති බව මයික්‍රොසොෆ්ට් සමාගම පවසනවා.

Xbox One X කොන්සෝලය දැනට ඇති සුපිරිම ගේම් කොන්සෝලය දැයි තවමත් හරියටම අපිට කියන්නට බැහැ. ඒ කෙසේ වුවත් Play Station කොන්සෝලයට අපේ වීඩියෝ ක්‍රීඩා ලෝලීන් ගේ ඇති කැමැත්ත Xbox One X කොන්සෝලයෙන් යට නොවෙනු ඇති බව නම් අපට නිසැකවම කියන්නට පුළුවන්.